Azərbaycan teatr, kino və radio sənətinin görkəmli nümayəndələrindən biri, aktyor və diktor Yusif Muxtarovun doğum günüdür.

ERAmedia xəbər verir ki, sənətkarın zəngin yaradıcılıq irsi bu gün də Azərbaycan mədəniyyətinin dəyərli nümunələri sırasında qorunur.

Yusif Muxtarov uzun illər ərzində peşəkar diktor kimi fəaliyyət göstərərək Azərbaycan radiosunun inkişafında mühüm rol oynayıb. Onun ifasında səslənən 350-dən artıq bədii veriliş Azərbaycan Radiosunun “Qızıl fondu”nda saxlanılır.

Sənətçinin bənzərsiz səsi kino sahəsində də geniş istifadə olunub. Onun iştirakı ilə Azərbaycan dilində çoxsaylı filmlər səsləndirilib. YUNESKO tərəfindən hazırlanmış iki qızıl diskdə Yusif Muxtarovun səsinin qorunması isə onun sənətinin beynəlxalq səviyyədə qiymətləndirildiyini göstərir.

Muxtarov pedaqoji fəaliyyətə də böyük önəm verib. Azərbaycan Dövlət Mədəniyyət və İncəsənət Universitetində uzun illər çalışan sənətkar səhnə danışığı fənnindən dərs deyərək gənc aktyor nəslinin yetişməsinə töhfə verib.

1992-ci ildə görkəmli aktrisa Amaliya Pənahova ilə birlikdə Bakı Bələdiyyə Teatrının yaradılmasında iştirak edən Yusif Muxtarov ömrünün sonunadək bu sənət ocağında rəhbər vəzifədə çalışıb.

Aktyor kimi də geniş yaradıcılıq fəaliyyəti göstərən sənətkar “Qəribə adam”, “İki qardaş”, “Vaqif”, “Xoşbəxtlər”, “Bayramın ilk günü”, “Duel”, “Qırmızı yaylıqlı qovağım mənim”, “On iki manatlıq lüstr”, “Söyüdlü arx” kimi tamaşalarda, eləcə də “Baladadaşın ilk məhəbbəti” və “Gecə qatarında qətl” filmlərində yaddaqalan obrazlar yaradıb.

Yusif Muxtarov 2010-cu ildə dünyasını dəyişsə də, onun səsi, səhnə fəaliyyəti və mədəniyyətə verdiyi töhfələr Azərbaycan incəsənət tarixində yaşamaqda davam edir.