ABŞ Konqresinin polisinin məlumatına görə, “Cannon House Office Building” binasında keçirilən etiraz aksiyası zamanı azı 62 nəfər həbs edilib.

ERAmedia xəbər verir ki, bu barədə “The Hill” nəşri məlumat yayıb.

Aksiya bir neçə veteran və anti-müharibə təşkilatı tərəfindən təşkil olunub. Etirazçılar ABŞ zərbələri nəticəsində həlak olan iranlıların xatirəsinə qırmızı lalələr tutub, “İrana qarşı müharibəni dayandırın” şüarları yazılmış bannerlər açıb. Onlar həmçinin həlak olmuş amerikalı hərbçilərin xatirəsini simvolizə edən bayraq qatlama mərasimi keçirib və polis müdaxilə edənədək anti-müharibə şüarları səsləndiriblər.

Təşkilatçıların bildirdiyinə görə, aksiya iştirakçıları Nümayəndələr Palatasının spikeri Mayk Conson ilə görüş tələb edib və fevralın 28-də başladığı bildirilən münaqişənin maliyyələşdirilməsinin dayandırılmasına çağırıblar.

Saxlanılanlar arasında “Center on Conscience and War” təşkilatının icraçı direktoru, İraq müharibəsi veteranı Mayk Prisner də olub. O, münaqişəni “dərin şəkildə qeyri-populyar” adlandıraraq, fəaliyyətdə olan hərbçilərin vicdani səbəblərlə xidmətdən imtina hüququnun olduğunu bildirib.

Aksiya ABŞ, İsrail və İran arasında iki həftəlik atəşkəsin başa çatmasına az qalmış keçirilib. ABŞ prezidenti Donald Tramp atəşkəsin uzadılması ehtimalını rədd edib, Tehranın nüvə proqramını istisna edən razılaşmanın zəruriliyini bir daha vurğulayıb və imtina halında mümkün nəticələr barədə xəbərdarlıq edib.

ABŞ və İran arasında danışıqların çərşənbə günü Islamabad şəhərində keçirilməsi planlaşdırılır, lakin İran tərəfinin iştirakı hələ təsdiqlənməyib.

Vural