ABŞ Hərbi Hava Qüvvələrinin Yaxın Şərqdə həyata keçirdiyi əməliyyatlarda iştirak edən qırıcıların silahlanması ilə bağlı yeni detallar açıqlanıb.

ERAmedia xəbər verir ki, İordaniyadakı aviabazalardan qalxaraq İran istiqamətində tapşırıqlara cəlb olunan təyyarələr müxtəlif raket və yüksək dəqiqlikli bombalarla təchiz edilib.

Məlumata əsasən, F-35 Lightning II qırıcıları əməliyyatlarda əsasən “stels” rejimində istifadə olunur. Bu rejimdə təyyarənin görünməzlik xüsusiyyətlərini qorumaq üçün bütün silahlar daxili bölmələrdə yerləşdirilir.

Əməliyyatlarda iştirak edən F-16 “Fighting Falcon” qırıcıları isə daha geniş silah çeşidi daşıyır. Bu təyyarələr hava hədəfləri üçün AIM-120 və AIM-9 raketləri ilə yanaşı, radar sistemlərini məhv etmək üçün AGM-88 HARM raketləri, həmçinin yüksək dəqiqlikli GBU-31 JDAM bombaları ilə silahlandırılıb. Bundan başqa, onların üzərində AN/ALQ-167 radioelektron mübarizə podu da yerləşdirilib.

Zərbə imkanları ilə seçilən F-15E “Strike Eagle” qırıcıları isə əsasən idarəolunan bombalar daşıyır. Bu təyyarələrin hər biri 6 ədəd GBU-38 və 1 ədəd GBU-31 JDAM bombası ilə təchiz olunub.

Radioelektron mübarizə tapşırıqlarını yerinə yetirən EA-18G “Growler” təyyarələri də əməliyyatlarda iştirak edir. Onların silahlanmasına 4 ədəd AGM-88E AARGM raketi və 2 ədəd AIM-120 raketi daxildir.

Beləliklə, əməliyyatlara cəlb olunan ABŞ qırıcıları həm hava üstünlüyünü qorumaq, həm də yerüstü hədəflərə yüksək dəqiqliklə zərbə endirmək üçün müxtəlif tipli silah sistemləri ilə təchiz edilib.

Vural