Qərb bölgəsində sorqo becərən təsərrüfatların böyük hissəsi Ağstafanın payına düşür. Fermerlər sorqonun az xərc tələb etməsini, quraqlığa və xəstəliklərə davamlılığını, eləcə də gəlirliliyini üstünlük kimi göstərirlər.

ERAmedia xəbər verir ki, Ağstafa rayonunda sorqonun yığımına başlanılıb.

Elmi adı “sorqo” olan bu dənli bitki xalq arasında “süpürgə otu” kimi tanınır. Gövdə və çiçək qrupu süpürgənin əsas xammalıdır. Dənindən isə spirt, nişasta və yarma istehsal edilir. Afrika, Hindistan və Şərqi Asiyanın bəzi ölkələrində bu bitkidən çörək bişirilməsində də istifadə olunur.

Ağstafada sorqo əsasən Kürboyu kəndlərdə becərilir.

Yığım işin yalnız başlanğıcıdır. Bitkinin qurudulması, təmizlənməsi, dəstələnməsi təsərrüfatlarda əl əməyi ilə görülür.

Təsərrüfat sahibi Tahir Tomayev deyir ki, süpürgənin hazırlanması diqqət və təcrübə tələb edir. Hər süpürgə üçün uyğun miqdar seçilir: “Bir-bir dəstə halına salırıq. Sağlam və görünüşü yaxşı olanları seçirik. Əlimdə tutanda artıq bilirəm ki, bir süpürgənin hazırlanması üçün nə qədər lazımdır. İki dəstədən biri çıxır. Beləliklə, süpürgə hazırlanır.”