Prezident İlham Əliyevin birmənalı mövqeyi, faktların cəmiyyətlə açıq bölüşülməsi Rusiyanın məsuliyyətdən qaçmaq imkanını məhdudlaşdırdı və sonda rəsmi Moskva təyyarənin vurulması ilə bağlı günahını etiraf etməli oldu.

Məhz Düşənbə sammitindən sonra yazmışdım ki, prezidentlər arasında görüş və Putinin üzr istəməsi soyumuş münasibətləri dərhal isitməyəcək. Bu, bir neçə mərhələli prosesdir və buna zaman lazımdır.

İlkin baxışda Azərbaycan Prezidenti Ramzan Kadırova protokol jesti etdi. İlham Əliyevin şəxsən avtomobil idarə etməsi və Kadırovu Ağ Şəhərdə müşayiət etməsinin də bir siyasi mənası var.

Bir liderin digər liderin avtomobilinə əyləşməsi, birlikdə hərəkəti münasibətlərin normal olduğu dönəmdə qarşılıqlı etibar göstəricisidir. Ancaq indiki halda bu, qarşılıqlı etibardan çox, regionda sükanın kimin əlində olmasının nümayişidir.

Ağ Şəhər ziyarəti bir tərəfdən memarlıq layihəsi kimi oxunursa, digər tərəfdən simvolik olaraq münasibətlərdə qara dönəmin başa çatmasının və yeni ağ dönəmin başlamasının simvolu kimi qəbul edilə bilər.

İran və Rusiya ətrafında baş verənlər hər keçən gün Azərbaycanın geostrateji əhəmiyyətini hər iki ölkə üçün artırmaqdadır. Qərbin sanksiyalarından əziyyət çəkən həm Tehran, həm də Moskva iqtisadi əlaqələrinin dərinləşdirilməsinə çalışırlar. İran Rusiya, Rusiya isə İran bazarında mövqelərini gücləndirməyə çalışır. Ancaq hər iki tərəfin arzularının çin olması rəsmi Bakı ilə münasibətlərdən asılıdır.