Avqustun 30-da Türkiyədə Zəfər bayramı qeyd olunur.

ERAmedia xəbər verir ki, bu münasibətlə Türkiyənin Azərbaycandakı səfirliyinin əməkdaşları, Türkiyə Silahlı Qüvvələrinin ölkəmizdəki hərbi attaşeliyi, türkiyəli iş adamları avqustun 29-da Şəhidlər xiyabanına gələrək, 1918-ci ildə Bakının bolşevik-erməni daşnak qoşunlarından azad edilməsi uğrunda döyüşlərdə şəhid olmuş, Azərbaycanın müstəqilliyi uğrunda mübarizədə canından keçmiş türk şəhidlərinin xatirəsinə ucaldılmış abidəni ziyarət edib, önünə əklil qoyublar.

Müdafiə Nazirliyinin Əlahiddə Nümunəvi Hərbi Orkestrinin ifasında Azərbaycan və Türkiyənin Dövlət himnləri səsləndirilib.

Əvvəlcə Zəfər bayramının tarixi barədə məlumat verilib. Bildirilib ki, Türkiyə xalqı və Türkiyə Silahlı Qüvvələri qazi Mustafa Kamal Atatürkün rəhbərliyi ilə 103 il bundan əvvəl, 1922-ci il avqustun 30-da şanlı Zəfər qazanaraq, bu tarixi yaddaşlara azadlıq günü kimi həkk edib. Vurğulanıb ki, qəhrəman Türkiyə Silahlı Qüvvələri Prezident Rəcəb Tayyib Ərdoğanın rəhbərliyi altında Böyük Türk millətinin və Türkiyə Cümhuriyyətinin təhlükəsizliyini keçmişdə olduğu kimi bu gün də ən yüksək səviyyədə təmin etmək üçün var gücü ilə çalışır.

Şəhidliyin xatirə dəftərini imzalayan Türkiyənin Azərbaycandakı səfiri Birol Akgün həmin şanlı qələbə sayəsində Türkiyə xalqının onu tarixdən silmək istəyən güclərə unudulmaz dərs verdiyini diqqətə çatdırıb. Qeyd olunub ki, bununla da Türkiyə Cümhuriyyətinin qurulması yolunda mühüm mərhələ uğurla başa çatdırılıb. “Eyni inam və ruhla Azərbaycanın müstəqilliyi yolunda canını fəda edən, şəhidlik zirvəsinə ucalan sizlər “Bir millət, iki millət” devizinin təməlinin qoyulmasında, qardaşlığımızın möhkəmlənməsində, şübhəsiz ki, böyük rol oynadınız. Sizdən miras qalan və müttəfiqlik səviyyəsinə yüksəltdiyimiz əlaqələrimizin gələcək dövrdə daha da dərinləşdirilməsi istiqamətində səylərimizi dayanmadan davam etdirəcəyik. Biz 30 avqust və 8 noyabr qələbə ildönümlərini azərbaycanlı qardaşlarımızla çiyin-çiyinə keçirməkdə davam edəcəyik. Bu münasibətlə başda Qurtuluş Savaşımızın baş komandanı, dövlətimizin qurucusu Mustafa Kamal Atatürk olmaqla vətənimiz uğrunda canlarını fəda etməyə bir an belə tərəddüd etməyən əziz şəhidlərimizi, Azərbaycanın hər bir guşəsində şəhadət zirvəsinə ucalan qəhrəmanlarımızı, ölkəmizin və qardaş Azərbaycanın bütün şəhidlərini rəhmət və ehtiramla anır, onların hüzurunda hörmətlə baş əyirik. Ruhları şad olsun”, – deyə səfir fikirlərinə yekun vurub. Sonra Azərbaycanın azadlığı uğrunda canlarını fəda etmiş türk əsgərlərinin adları və soyadları həkk olunmuş Şəhidlik kitabəsinin üstünə gül dəstələri düzülüb.

Mərasim iştirakçıları, həmçinin Azərbaycanın müstəqilliyi və ərazi bütövlüyü uğrunda mübarizədə canından keçmiş qəhrəman Vətən övladlarının xatirəsini ehtiramla yad edib, şəhidlərin məzarları üzərinə gül dəstələri düzüb, “Əbədi məşəl” abidəsinin önünə əklil qoyublar.