Hər il sentyabrın ikinci şənbə günü 2000-ci ildən etibarən Ümumdünya İlk Tibbi Yardım Günü kimi qeyd olunur.

ERAmedia xəbər verir ki, bu günün yaranma tarixi 1881-ci il dekabrın 8-də Avstriyanın paytaxtı Vyana şəhərində teatr binasında baş verən güclü yanğınla əlaqədardır.

Yanğın zamanı həlak olanların sayı çox olduğuna görə tibbi yardım göstərilməsində problemlər yaranır və bundan sonra ilk dəfə Vyanada müstəqil təcili tibbi yardım xidmətinin yaradılması qərara alınır. Daha sonra Almaniyanın Berlin və Böyük Britaniyanın London şəhərlərində də təcili tibbi yardım briqadaları fəaliyyət göstərməyə başlayır.

İlkin tibbi yardımın məqsədi zərərçəkənin həyatını xilas etməklə yanaşı, sadə tibbi tədbirlər görməklə onun ağrılarını azaltmaq və mümkün ağırlaşmaların qarşısını almaqdır.

Təcrübə göstərir ki, təcili tibbi yardıma əksər hallarda qəflətən ehtiyac yaranır. Bəzən vaxt qıtlığı səbəbindən həmin yardımın tibbi təhsili olmayanlar tərəfindən yerinə yetirilməsi lazım gəlir. Ona görə də vaxtın hər anının dəyərli olduğu məqamlarda tez və qətiyyətli hərəkət etmək lazımdır.

Ümumdünya Səhiyyə Təşkilatının hesablamalarına əsasən, hər il dünyada baş verən yol qəzaları, yanğınlar, hündürlükdən düşmələr, boğulma kimi hadisələrin 10 faizi ölüm, 15 faizi isə əlilliklə nəticələnir. Həmin hadisələr zamanı ölənlərin əksəriyyətini 15-45 yaş arasında olanlar təşkil edir.

Qeyd edək ki, ölkəmizdə təcili tibbi yardım xidmətinin əsası 1922-ci ildə qoyulub. Azərbaycan müstəqilliyini bərpa etdikdən sonra ölkədə təcili tibbi yardım xidmətinin inkişafına böyük diqqətin göstərilməsinə başlanılıb. Xüsusilə də son illər təcili tibbi yardım avtomobilləri parkı yenilənir, müasir tibbi avadanlıqları olan nəqliyyat vasitələri əhaliyə xidmət üçün istismara buraxılır. Eyni zamanda, dərman təchizatı ildən-ilə yaxşılaşır, çeşid genişlənir, tibbi heyət müasir geyimlərlə təchiz edilir, həkim və orta tibb işçilərinin peşəkarlığı daha da artır.