İslandiyada ilk dəfə ağcaqanadlar aşkar olunub. Bildirilir ki, bu, qlobal istiləşməni sübut edən amillərdən biridir. 

Bu aya qədər İslandiya dünyada ağcaqanad populyasiyasının müşahidə olunmadığı azsaylı yerlərdən biri idi. Digər belə yer isə Antarktidadır.

Alimlər uzunmüddətdir proqnozlaşdırırlar ki, ağcaqanadlar İslandiyada məskunlaşa bilərlər, çünki burada bataqlıqlar və gölməçələr kimi bu həşəratın çoxalması üçün əlverişli sahələr mövcuddur. Lakin bir çox növlər sərt iqlim şəraitində yaşaya bilmir. Bununla belə, İslandiyada istiləşmə baş verir və bu proses Şimal yarımkürəsinin digər hissələrinə nisbətən dörd dəfə daha sürətlidir. Buzlaqlar əriməkdə davam edir, ölkə sularında isə daha isti hava şəraitinə məxsus cənub bölgələrində rast gəlinən balıqlar, məsələn, skumbriya müşahidə olunur.

Planet istiləşdikcə dünyanın müxtəlif yerlərində daha çox ağcaqanad növləri qeydə alınır. Bu il Böyük Britaniyada misir ağcaqanadının (Aedes aegypti) yumurtaları, Kent qraflığında isə Asiya pələng ağcaqanadı (Aedes albopictus) aşkarlanıb. Bunlar invaziv növlərdir və denge qızdırması, çikunqunya və zika virusu kimi tropik xəstəlikləri yaymaq qabiliyyətinə malikdirlər.

İslandiya Təbiət Elmləri İnstitutunun entomoloqu Mattias Alfredsson tədqiqatın nəticələrini təsdiqləyib. O deyib: “Kidasfetl, Kyos ərazisində “Culiseta annulata” növünə aid üç nümunə – iki dişi və bir erkək fərd aşkar edilib. Onların hamısı kəpənəkləri cəlb etmək məqsədilə şərab butulkalarının bağlanması zamanı istifadə olunan şərab kəndirlərindən toplanıb”.

Bu növ soyuğa davamlıdır və qış aylarında zirzəmilərdə və anbarlarda gizlənərək İslandiya şəraitində yaşaya bilir.