Şimali Koreyada COVID-19 pandemiyası dövründə edamların kəskin şəkildə artdığı barədə məlumat yayılıb.

ERAmedia xəbər verir ki, yeni bir hesabata əsasən, xüsusilə xarici mədəniyyətin istehlakı və siyasi cinayətlərə görə tətbiq olunan ölüm cəzalarında ciddi yüksəliş müşahidə olunub.

Pxenyan rəhbərliyi koronavirusun yayılmasının qarşısını almaq məqsədilə 2020-ci ilin yanvarında sərhədləri bağlamışdı. İnsan haqları müdafiəçiləri bildirirlər ki, bu addım ölkədə mövcud hüquq pozuntularını daha da ağırlaşdırıb.

Hesabata görə, sərhədlərin bağlanmasından sonrakı təxminən beş il ərzində edamlar və ölüm hökmləri əvvəlki dövrlə müqayisədə iki dəfədən çox artıb. Eyni müddətdə ölüm cəzasına məhkum edilənlərin sayının isə üç dəfədən çox yüksəldiyi qeyd olunur. Araşdırma çərçivəsində yüzlərlə şimali koreyalı qaçqından əldə edilən məlumatlar əsasında ümumilikdə 144 edam və ölüm hökmü faktı təhlil edilib.

Pandemiyadan sonrakı dövrdə xüsusilə Cənubi Koreya istehsalı olan film, serial və musiqi kimi “xarici mədəniyyət” fəaliyyətlərinə görə verilən ölüm cəzalarında böyük artım qeydə alınıb. Siyasi cinayətlər kateqoriyasında isə lider Kim Çen Inı tənqid etmək kimi əməllərə görə həyata keçirilən edamların da ciddi şəkildə çoxaldığı vurğulanır. Hesabat müəllifləri bu tendensiyanı “artan daxili narazılığa qarşı dövlətin təzyiqləri gücləndirməsi” ilə izah edirlər.

Məlumata görə, edamların təxminən dörddə üçü ictimai şəkildə həyata keçirilib və əksər hallarda güllələnmə üsulundan istifadə olunub. Şimali Koreya hökuməti eyni zamanda işgəncə, məcburi əmək və ifadə, eləcə də hərəkət azadlıqlarının ciddi şəkildə məhdudlaşdırılması kimi çoxsaylı insan haqları pozuntularında ittiham olunur.

Ölkədə təxminən 65 min nəfərin saxlanıldığı dörd siyasi məhbus düşərgəsinin mövcud olduğu və bu şəxslərin ağır şəraitdə məcburi əməyə cəlb edildiyi bildirilir. Birləşmiş Millətlər Təşkilatının rəsmiləri isə son on ildə Şimali Koreyada insan haqları vəziyyətinin yaxşılaşmadığını, əksinə bir çox sahələrdə daha da pisləşdiyini qeyd ediblər.

Vüsalə