Bu gün Azərbaycanda Dövlət Qulluqçularının Peşə Bayramı Günü kimi qeyd olunur. Dövlət qulluğu ölkənin idarəetmə sisteminin əsas sütunlarından biri olmaqla, dövlət siyasətinin həyata keçirilməsində, vətəndaşların hüquq və mənafelərinin qorunmasında, eləcə də ictimai xidmətlərin təşkili və icrasında mühüm rol oynayır. Bu sistemdə çalışan şəxslərin peşəkarlığı, bilik və bacarıqları ilə yanaşı, yaş tərkibi də dövlət idarəçiliyinin mövcud vəziyyətini və inkişaf istiqamətlərini əks etdirən mühüm göstəricilərdən hesab olunur.

ERAmedia xəbər verir ki, 2026-cı il yanvarın 1-nə olan statistik məlumatlar göstərir ki, dövlət qulluğunda çalışanların yaş tərkibində orta yaş qrupu üstünlük təşkil edir. Belə ki, dövlət qulluqçularının ən böyük hissəsi 30-34 yaş aralığında olan şəxslərdən ibarətdir. Bu kateqoriyanın ümumi dövlət qulluqçuları arasındakı payı 18 faiz təşkil edir. Sonrakı yerlərdə 35-39 yaş qrupu (16,7 faiz) və 40-44 yaş qrupu (13,3 faiz) qərarlaşır.

Məlumatların təhlili göstərir ki, dövlət idarəetmə sistemində əsas təmsilçilik 30-44 yaş aralığında olan əməkdaşların payına düşür. Bu da bir tərəfdən gənc və orta yaşlı kadrların dövlət qulluğunda fəal iştirakını, digər tərəfdən isə idarəçilik üçün zəruri olan təcrübə amilinin qorunduğunu göstərir.

Statistikaya əsasən, 25-29 yaşlı dövlət qulluqçularının payı 11,6 faiz, 45-49 yaşlıların payı 10,5 faiz, 50-54 yaşlıların payı isə 8,1 faiz təşkil edir. 55-59 yaş qrupunda bu göstərici 7,5 faiz, 60-64 yaş qrupunda isə 9,2 faizdir.

Diqqət çəkən məqamlardan biri dövlət qulluğunda ən gənc yaş qrupunun xüsusi çəkisinin nisbətən aşağı olmasıdır. Belə ki, 25 yaşadək dövlət qulluqçularının payı cəmi 3 faiz təşkil edir. Bu göstərici dövlət qulluğuna qəbul prosesinin xüsusiyyətləri ilə izah oluna bilər. Ali təhsil, müsabiqə və müsahibə mərhələləri nəzərə alındıqda, əksər namizədlər dövlət qulluğuna əmək fəaliyyətinin ilk illərində qoşulurlar.

Eyni zamanda, dövlət qulluğunun yalnız yaşlı nəslin fəaliyyət sahəsi olması ilə bağlı fikirlər də rəqəmlərlə təsdiqini tapmır. Belə ki, 65 yaş və yuxarı şəxslərin ümumi dövlət qulluqçuları arasındakı payı 2,1 faiz təşkil edir. Bu isə göstərir ki, dövlət qulluğunda yaş amilindən daha çox peşə hazırlığı, ixtisas və idarəçilik bacarıqları ön plana çıxır.

Yaş bölgüsü vəzifələrin təsnifatı üzrə də fərqli mənzərə ortaya qoyur. Ali təsnifatlı inzibati vəzifələrdə daha çox 40-49 yaş aralığında olan şəxslər təmsil olunur. Bu isə rəhbər vəzifələrdə uzunmüddətli peşə təcrübəsinin və idarəçilik bacarıqlarının mühüm əhəmiyyət daşıdığını göstərir. Digər tərəfdən, aşağı və orta təsnifatlı inzibati vəzifələrdə 30-39 yaş qrupunun üstünlük təşkil etməsi dövlət qulluğunda karyera inkişafının mərhələli şəkildə formalaşdığını göstərən göstəricilərdən biridir.

Ümumilikdə, statistik rəqəmlər dövlət qulluğunda müxtəlif yaş qrupları arasında balansın qorunduğunu nümayiş etdirir. Bu balans həm gənc kadrların sistemə inteqrasiyasına, eləcə də uzun illərin təcrübəsinə malik əməkdaşların dövlət idarəçiliyində fəaliyyətini davam etdirməsinə imkan yaradır. Bununla belə, dövlət qulluğunda uğurun əsas meyarı yaş deyil, peşəkarlıq, bilik, məsuliyyət və dövlətə xidmət prinsipinə sadiqlikdir. Yaş tərkibi isə bu sistemdə müxtəlif nəsillərin təcrübə və potensialının bir araya gəldiyini göstərən mühüm göstəricilərdən biri kimi çıxış edir. (Modern.az)