ABŞ ordusunun keçmiş kəşfiyyat və xüsusi təyinatlı hərbi əməkdaşı Bret Velikoviçin sözlərinə görə, İranın Kaliforniyadakı obyektlərə dronlarla ölümcül zərbələr endirmək üçün texnologiya, imkan və motivasiyası var.

ERAmedia xəbər verir ki, bu barədə məlumatı “The Post” nəşri yayıb.

Velikoviç bildirib ki, İran çox güman ki, Kaliforniyanın sahil bölgəsinə dronlarla hücum planlaşdırır. Ekspertin fikrincə, FTB-nin yerli hüquq-mühafizə orqanlarını xəbərdar etməsi bu təhlükənin ciddiliyini göstərir. “Biz dron hücumlarına qarşı son dərəcə həssasıq. Hazır deyilik”, — deyə o vurğulayıb.

O qeyd edib ki, İranın minlərlə döyüş dronu var ki, bunlar minlərlə mil məsafəyə idarə oluna bilər və hədəfə yüzlərlə mil uça bilər. “Bu, uzaqmənzilli, bir dəfə istifadə olunan zərbə dronlarıdır, inanılmaz dərəcədə təsirlidirlər və sürülər şəklində istifadə oluna bilərlər”, — deyə Velikoviç açıqlayıb.

Ekspert əlavə edib ki, belə dronlar gəmidən, hətta FTB-nin Kaliforniyada xəbərdarlıq etdiyi kimi, pilotsuz qayıqlardan da buraxıla bilər. “Yanında insanın olması mütləq deyil. Siz Starlink vasitəsilə hədəfdən 1 000 mil uzaqda qayıqdan dronları buraxa bilərsiniz”, — deyə o bildirib.

Velikoviç dronların mümkün hədəflərini belə sıralayıb: şəhər mərkəzləri, limanlar, infrastruktur obyektləri, idman tədbirləri, otellər, ofis binaları, dövlət müəssisələri və hərbi bazalar.

O bildirib ki, Kaliforniyaya qarşı istifadə oluna biləcək dronlar partlayıcı ilə təchiz olunacaq və yalnız GPS koordinatlarından istifadə etməklə hədəfi dəqiq vurmaq qabiliyyətinə malikdir.

Belə hücumlardan qorunmaq üçün çoxsəviyyəli sistem tələb olunur: dronları vurmaq üçün raketlər, idarəetməni və naviqasiyanı pozmaq üçün siqnal bloklayıcılar, elektronikasını sıradan çıxarmaq və ya qarışdırmaq üçün lazerlər.

“Dronlara qarşı tək bir həll yolu yoxdur. Bəzən onları sadəcə pulemyotla vurmaq lazım gəlir”, — deyə ekspert bildirib.

Velikoviç FTB-nin və yerli hüquq-mühafizə orqanlarının xəbərdarlığını doğru hesab edir: “Əgər real təhlükə barədə etibarlı məlumat varsa, onlar amerikalıları və yerli orqanları xəbərdar etməlidirlər”, — deyə o əlavə edib.

Ötən həftə Los-Anceles polisi də xəbərdarlıq edib.

“Biz Los-Ancelesin hər bir sakininə bildiririk ki, Yaxın Şərqdəki mövcud münaqişə zamanı bütün federal, ştat və yerli tərəfdaşlarla kəşfiyyat məlumatlarını paylaşmaq üzrə koordinasiyanı davam etdiririk. Biz məlumatları real vaxt rejimində emal edir, hər bir etibarlı məlumatı yoxlayır və təhlükəsizlik tədbirlərini lazımi şəkildə tənzimləyirik. Hazırda Los-Ancelesə konkret təhdid aşkar edilməyib. Polis şəhərin təhlükəsizliyini təmin etməyə hazırdır”, — deyə açıqlamada vurğulanıb.

Vural