Yaşlanma avtomobili təhlükəsiz idarə etmə qabiliyyətinə təsir göstərə bilən dəyişikliklərlə müşayiət olunur. Görmənin zəifləməsi, reaksiya sürətinin və idrak funksiyalarının azalması risk yarada bilər. Bununla belə, ekspertlər vurğulayırlar ki, hamı üçün keçərli olan konkret bir yaş həddi yoxdur və “açarları təhvil vermək” üçün universal zaman müəyyən edilməyib.

ERAmedia xəbər verir ki, “Kaiser Permanente” kimi tibbi qurumların mütəxəssisləri fərdi yanaşmanı tövsiyə edirlər.

Onların fikrincə, qərar insanın sağlamlıq vəziyyəti, alternativ nəqliyyat imkanlarının olub-olmaması və sürücünün özünü necə hiss etməsi kimi amillər əsasında verilməlidir. Bununla yanaşı, mütəxəssislər qeyd edirlər ki, bir çox insanlar avtomobili lazım olduğundan daha uzun müddət idarə edirlər. Onların qənaətincə, sürücülüyü dayandırmaq mövzusunda söhbətə təxminən 70 yaşdan etibarən başlamaq olar.

Statistikaya görə, bu yaşda və daha yuxarı olan sürücülər yol-nəqliyyat hadisələrinə digər yaş qruplarına nisbətən daha tez-tez düşürlər. Bu göstərici yalnız 25 yaşadək gənc sürücülərlə müqayisə edilə bilər. Məhz buna görə də müntəzəm tibbi müayinələrdən keçmək və həkimlə avtomobil idarə etmə qabiliyyəti barədə açıq şəkildə danışmaq vacib hesab olunur.

Harvard Tibb Məktəbinin nəşri olan “Harvard Health Publishing” mütəxəssisləri isə sürücülük bacarıqlarının zəiflədiyini göstərə bilən praktiki əlamətlərə diqqət yetirməyi məsləhət görürlər. Bunlara ailə üzvlərinin və ya dostların həmin şəxslə birgə avtomobildə getməkdən imtina etməsi, tez-tez qəfil əyləcləmələr, eləcə də avtomobildə yaranan cızıqlar və əziklər daxildir.

Məlumatlara əsasən, qəza riski xüsusilə 80 yaş və yuxarı sürücülərdə kəskin şəkildə artır ki, bu da vəziyyəti qiymətləndirmək üçün əlavə göstərici sayılır.

Dövlət səviyyəsində isə müxtəlif ölkə və regionlarda yaşlı sürücülərə yanaşma fərqlidir. Bir çox yerlərdə yalnız görmə qabiliyyətinin müntəzəm yoxlanılması tələb olunur, bəzi ölkə və ştatlarda isə müəyyən yaş həddinə çatdıqdan sonra məcburi tibbi və ya praktiki imtahanlar tətbiq edilir.

Ümumilikdə ekspertlər razılaşırlar ki, avtomobil idarə etməyi dayandırmaqla bağlı qərar verərkən obyektiv tibbi qiymətləndirmə, ailənin müşahidələri və sürücünün öz hissləri birlikdə nəzərə alınmalıdır.

Vural Həsənoğlu