1937-ci il iyunun 3-dən 4-nə keçən gecə Bakıda tanınmış ədib Hüseyn Cavidin evində təhlükəsizlik orqanları tərəfindən xüsusi əməliyyat həyata keçirilib. Hadisə 509 saylı order əsasında baş tutub. Əməliyyatda NKVD-nin 4-cü şöbəsinin əməkdaşları iştirak edib.

ERAmedia bildirir ki, məlumata görə, gecə saatlarında evə daxil olan üç nəfər – Pavlov, Federenko və Sərkisyan – mənzil daxilində axtarış aparıb. Axtarış zamanı qonşulardan biri də şahid qismində evə çağırılıb.

Axtarış təxminən səhərə qədər davam edib. Evin hər hissəsi yoxlanılıb. Ailənin xatirələrinə görə, bu anlar böyük gərginlik və qorxu içində keçib.

Şairin həyat yoldaşı Mişkinaz xanım həmin gecəni xatırlayaraq evdə qeyri-adi səslər eşitdiyini, vəziyyətin çox qarışıq olduğunu bildirib. Onun sözlərinə görə, Cavid həmin anlarda son dərəcə sakit, lakin ağır psixoloji vəziyyətdə olub.

Mişkinaz Cavidin dediyinə görə, gecəyarısı evə daxil olan şəxslər ailəni ciddi şəkildə təşvişə salıb. O, həmin anlarda qorxu və çaşqınlıq içində olduqlarını, nə baş verdiyini tam dərk edə bilmədiklərini qeyd edir.

Xatirələrdə bildirilir ki, axtarış zamanı hətta kiçik otaqlar da yoxlanılıb, evdə uzun müddət davam edən gərginlik yaşanıb.

Bu hadisə sonradan Cavid ailəsinin həyatında dərin iz buraxan dönüm nöqtələrindən biri kimi xatırlanır. Şairin yaxınları həmin gecəni ailə üçün “başlanğıcın sonu” kimi dəyərləndiriblər.

Vural