“International Congress and Convention Association” tərəfindən hazırlanan 2025-ci il ölkələr və şəhərlər reytinqi hesabatına görə, Türkiyə beynəlxalq böyükmiqyaslı konqreslərin keçirilməsi üzrə mövqeyini qoruyaraq dünya sıralamasında 33-cü yerdə qərarlaşıb.

ERAmedia-nın məlumatına görə, hesabatda bildirilib ki, ölkə 2025-ci ildə 142 beynəlxalq konqresə ev sahibliyi edib. Türkiyə ötən il Avropa reytinqində isə 18-ci pillədə yer alıb.

İstanbul isə konqres şəhərləri reytinqində yüksəlişini davam etdirib. Şəhər 2024-cü ildə Avropada 15-ci, dünyada 20-ci yerdə qərarlaşdığı halda, 2025-ci ildə iki pillə irəliləyərək 95 konqreslə dünya üzrə 18-ci sıraya yüksəlib. Bununla da İstanbul son 10 ilin ən yüksək göstəricisinə nail olub.

Hesabatda qeyd olunub ki, İstanbulun davamlı yüksəlişi Türkiyənin beynəlxalq konqres bazarındakı mövqeyinə müsbət təsir göstərib. Şəhərin xüsusilə tibb və elm sahələrində artan nüfuzu, sektor yönümlü konqres strategiyası ilə birlikdə beynəlxalq tədbirlərin şəhərin rəqabət qabiliyyətini və nüfuzunu gücləndirdiyini nümayiş etdirib.

Məlumata görə, İstanbul 2016-cı ildə 62 konqreslə dünya reytinqində 39-cu yerdə olsa da, 2017-ci ildə 133-cü pilləyə qədər geriləmişdi. Lakin 2022-ci ildən etibarən şəhər yenidən yüksəliş mərhələsinə daxil olub. İstanbul 2022-ci ildə 23-cü, 2023-cü ildə 21-ci, 2024-cü ildə isə 20-ci pillədə qərarlaşıb.

Dünya konqres şəhərləri reytinqində ilk yeri Lissabon tutub. İkinci sırada Paris, üçüncü yerdə isə Barselona qərarlaşıb. İlk onluğu həmçinin Vyana, Sinqapur, Praqa, Kopenhagen, London, Seul və Tokio tamamlayıb.

Ölkələr üzrə reytinqdə isə ABŞ liderliyini qoruyub saxlayıb. İtaliya ikinci, Almaniya isə üçüncü yerdə qərarlaşıb.

İstanbulun beynəlxalq konqres bazarında mövqeyini gücləndirmək məqsədilə fəaliyyət göstərən İstanbul “Congress and Visitors Bureau” şəhərə iri beynəlxalq tədbirlərin cəlb olunması üçün lobbiçilik fəaliyyətlərini genişləndirib. Qurum konqres qərarvericiləri və beynəlxalq assosiasiyalarla əməkdaşlığı artıraraq, xüsusilə Şimali Amerika və Latın Amerikası bazarlarına fokuslanıb.

ICVB, “United Nations Tourism Organization” və ICCA kimi beynəlxalq təşkilatlarla əməkdaşlığı inkişaf etdirir. Büro həmçinin Türkiye Tourism Promotion and Development Agency və Türk Hava Yolları ilə birgə “GoTürkiye Destinasiya Tanıtım Tədbiri” çərçivəsində Şimali Amerikanın aparıcı konqres qərarvericiləri ilə görüşlər keçirib.

Bundan başqa, ICVB WTM Latin Amerika sərgisində iştirak edərək Amerika qitəsindən İstanbula turist və beynəlxalq konqreslərin cəlb olunması istiqamətində təmaslar aparıb. Büro Avropa bazarında isə IMEX Frankfurt və IBTM Barcelona sərgilərində İstanbul stendi ilə təmsil olunur.

İstanbulun konqres turizmində ilk beş şəhər arasına daxil edilməsini hədəfləyən “Fikri Sərmayə Araşdırma Layihəsi” də şəhərin yüksəliş strategiyasının əsas hissələrindən biri kimi göstərilir. Layihə çərçivəsində beynəlxalq böyükmiqyaslı tədbirlərin İstanbula qazandırılması potensialına malik 74 fikir lideri müəyyənləşdirilib.

İstanbul “Chamber of Commerce” və ICVB rəhbəri Şekib Avdagiç bildirib ki, məqsəd əvvəlcə İstanbulu dünyanın ilk 10 konqres şəhəri sırasına, daha sonra isə ilk 5-liyə yüksəltməkdir.

Vüsalə