Kaliforniyada təklif olunan sərvət vergisinin qarşısını almaq məqsədilə yaradılan və Sergey Brinin maliyyələşdirdiyi, 100 milyon dollar dəyərindəki təşkilatın daxilində milyarderlər arasında ciddi fikir ayrılığı yaranıb.

ERAmedia-nın məlumatına görə, “The California Post” nəşri yazır ki, “Google”un keçmiş baş direktoru Erik Şmidt və digər nüfuzlu şəxslər koalisiyanın ilkin məqsədlərindən uzaqlaşmasından narazıdırlar.

Şmidt “Building a Better California” (“Daha yaxşı Kaliforniya qururuq”) fonduna 3 milyon dollar ianə edib. Məlumata görə, Kaliforniya Demokrat Partiyasının ştat bölməsi həmkarlar ittifaqlarının dəstəklədiyi sərvət vergisini müdafiə etdikdən və fondun dəstəklədiyi iki alternativ təşəbbüsün əleyhinə çıxdıqdan sonra Şmidt ciddi narazılıq nümayiş etdirib.

“Erik narazılığında tamamilə haqlıdır”, – deyə mənbə “The Post”a bildirib.

Bəzi donorlar və məsləhətçilər də “Building a Better California”nın eyni vaxtda altı müxtəlif regional təşəbbüsü dəstəkləməklə fəaliyyət istiqamətlərini həddindən artıq genişləndirməsindən narahat olmağa başlayıblar.

Fond Silikon Vadisinin milyarder xeyriyyəçilərindən böyük məbləğlər toplayıb. O cümlədən vençur kapitalisti Con Doerr 10 milyon dollar, Maykl Moritz isə 7,5 milyon dollar ianə edib.

Qrupun ilkin əsas məqsədi milyarderlərə tətbiq olunması nəzərdə tutulan və Kaliforniya iqtisadiyyatına ciddi zərər vura biləcəyi, kapitalın ştatdan çıxmasına səbəb ola biləcəyi düşünülən vergiyə mane olmaq idi. Lakin bəzi daxili mənbələr ekologiya siyasəti kimi digər sahələrə çəkilən xərclərin əsas məqsədi təhlükə altına sala biləcəyindən ehtiyat edirlər.

“Bir dəfə bu işlərlə məşğul olmağa başlayanda əvvəlki effektivliyinizi itirmək riski yaranır”, — deyə fond donorlarından birinin məsləhətçisi bildirib və məqsədlərin “parçalanması” təhlükəsi barədə xəbərdarlıq edib.

Şmidtin narazılığı iki həftə əvvəl San-Dieqoda keçirilən Kaliforniya Demokrat Partiyasının İcraiyyə Şurasının iclasında baş verən uğursuzluqdan sonra daha da artıb.

Partiya həmkarlar ittifaqları tərəfindən dəstəklənən 40 saylı Təşəbbüsə (Proposition 40) — sərvəti 1 milyard dollardan çox olan Kaliforniya sakinlərinin var-dövlətinə birdəfəlik 5 faizlik vergi tətbiq edilməsini nəzərdə tutan təşəbbüsə — dəstək verib. Eyni zamanda, Brinin qrupu tərəfindən vergiyə alternativ olaraq irəli sürülən 41 və 42 saylı təşəbbüslərin əleyhinə çıxıb.

41 saylı Təşəbbüs yeni xüsusi vergilər hesabına maliyyələşdirilən proqramların dövlət tərəfindən audit edilməsini tələb edəcəkdi. Bu isə “milyarderlər vergisi”ndən əldə ediləcək vəsaitlərin istifadəsini çətinləşdirə bilərdi.

42 saylı Təşəbbüs isə vergitutmanın geriyə şamil edilməsini qadağan edəcəkdi. Beləliklə, milyarderlər vergisi ilə bağlı qanunun qüvvəyə minməsindən əvvəl onun tətbiqini faktiki olaraq mümkünsüz edəcəkdi.

Mənbələrin bildirdiyinə görə, Hilltop Public Solutions şirkətinin tərəfdaşı və xidmət sahəsi işçilərinin həmkarlar ittifaqı olan SEIU-nun keçmiş direktoru Kortni Pyu Demokratları milyarderlər vergisinə münasibətdə neytral mövqe tutmağa, eyni zamanda 41 və 42 saylı təşəbbüsləri dəstəkləməyə inandırmalı idi.

Lakin nəticədə milyarderlər koalisiyası 0:3 hesabı ilə məğlub olub. Milyarderlər vergisi partiya tərəfindən dəstəklənməsi üçün tələb olunan 60 faizlik həddi cüzi fərqlə keçib.

Xavier Becerra-nın qubernator seçkiləri kampaniyasını da aparan Hilltop şirkəti 42 saylı təşəbbüsü dəstəkləyən komitədən 75 min dollar alıb. Becerra və Hilltop ilə seçki təşəbbüsləri məsələsində sıx əməkdaşlıq edən Kaliforniya qubernatoru Gavin Newsom da milyarderlər vergisinə qarşı çıxırlar.

Pyu şərh üçün göndərilən sorğulara cavab verməyib.

İyun ayına qədər “Building a Better California” fondu 118 milyon dollar toplayıb. Bunun 82 milyon dollarını şəxsən Sergey Brin təmin edib. Daha sonra o, əlavə 20 milyon dollar ayıraraq ümumi töhfəsini 102 milyon dollara çatdırıb.

İyulun 24-də həmin 20 milyon dollar 41 və 42 saylı təşəbbüslərin komitələri arasında bərabər bölünüb. Bu vəsait hər iki kampaniyanın xilasına kömək edib. Çünki təşəbbüslərin noyabr ayında keçiriləcək seçkilərin bülleteninə salınması üçün imza toplama kampaniyasına hər bir komitə təxminən 50 milyon dollar xərcləmişdi.

Lakin qrupun artan ambisiyaları qəribə ittifaqların yaranmasına və donorların narahat vəziyyətə düşməsinə səbəb olur.

“Building a Better California” fondu 45 saylı təşəbbüsə (Proposition 45) 10 milyon dollar ayırıb. Bu təşəbbüs Kaliforniyanın əsas ekoloji qanunlarından biri olan CEQA çərçivəsində mənzil, nəqliyyat, su, enerji və digər layihələr üzrə ekoloji ekspertizaların əhəmiyyətli dərəcədə sadələşdirilməsini nəzərdə tutur.

Təşəbbüsün tərəfdarları bunu bürokratik əngəllərin azaldılması və nəticədə mənzil və infrastruktur xərclərinin aşağı salınması vasitəsi kimi təqdim edirlər.

Lakin Erik Şmidtin həyat yoldaşı, ekoloji xeyriyyəçi Vendi Şmidt, aktrisa Ceyn Fonda ilə birlikdə 45 saylı təşəbbüsə qarşı kampaniyanın aparılmasına kömək edir. Onlar hesab edirlər ki, bu təşəbbüs Kaliforniyada mövcud ekoloji müdafiə mexanizmlərinə ciddi zərər vura bilər.

Vüsalə