ABŞ və İsrail rəsmilərinin məlumatına görə, bir neçə iranlı kürd qruplaşması ölkənin şimal-qərb bölgəsində mümkün bir hərbi əməliyyata hazırlaşır.

ERAmedia xəbər verir ki, bu barədə “Axios” nəşri məlumat yayıb.

Məlumata görə, “ABŞ-İsrail hava zərbələri ilə koordinasiya olunmuş kürd quru hücumu İran hakimiyyətinə təzyiqi artıraraq daxili üsyana səbəb ola bilər və bu üsyan ölkənin digər bölgələrinə yayıla bilər”.

Müharibənin başlanmasından altı gün əvvəl, İraqda sığınacaq tapmış beş iranlı kürd qruplaşması İran Kürdüstanının siyasi qüvvələri koalisiyasının yaradıldığını elan edib. Bu qruplar İran-İraq sərhədində minlərlə döyüşçüyə malikdir və strateji əhəmiyyətli əraziləri nəzarət altında saxlayır.

Son həftələrdə iranlı kürd qruplaşmaları sərhədin iraqlı tərəfindəki düşərgədən üzvlərinin yüzlərlə nəfərini İran tərəfə keçirib, mümkün hücum üçün hazırlıq aparıldığı bildirilib.

ABŞ və İsrailin iki rəsmisi, eləcə də vəziyyətlə tanış üçüncü bir mənbə bildirib ki, iranlı kürd silahlı qruplaşmalar Mossad və CIA tərəfindən dəstəklənir. Məqsəd İranın kürd bölgəsində müəyyən əraziləri ələ keçirməklə hakimiyyətə meydan oxumaq və daha geniş üsyana ilham verməkdir.

“Müharibə ABŞ və İsrail hərbi qüvvələrinin aktiv fəaliyyəti ilə başladı, amma davam etdikcə Mossad və CIA tərəfindən əlavə əməliyyatlar da həyata keçiriləcək”, – deyə İsrail rəsmisi bildirib.

İdeya, yəni iranlı kürd qruplaşmalarını dəstəkləyərək İraqdan İran ərazisinə quru hücumunu həyata keçirmək, ilkin olaraq İsrailin Baş naziri Binyamin Netanyahu və Mossad tərəfindən irəli sürülüb. Daha sonra bu təşəbbüsə CIA qoşulub. Bunu da ikinci bir ABŞ rəsmisi bildirib.

İsrail rəsmiləri kürd qruplaşmalarına yalnız hərbi deyil, həm də İran rejimi devrilsə, gələcəkdə Kürd muxtariyyətinin yaradılması üçün siyasi dəstək vəd edib.

“Problem ondadır ki, iranlı kürd fraksiyalarının hərbi gücü kifayət qədər deyil və onlar nəticədə ‘top ətinə’ çevrilə bilərlər”, – ABŞ rəsmisi bildirib.

ABŞ-ın Ağ Ev mətbuat katibi Karolina Livitt jurnalistlərə deyib ki, prezident Donald Trump iranlı kürd qruplaşmalarının hücumunu dəstəkləməyi təsdiqləməyib.

CIA və Mossad isə şərh verməkdən imtina edib.