“Amazon” şirkətinə məxsus “Zoox” ictimai yollarda hərəkət edən robotaksilərin davranışında problemlər aşkarlandıqdan sonra proqram təminatının könüllü geri çağırıldığını elan edib.

ERAmedia xəbər verir ki, bu barədə “Interesting Engineering” nəşri yazır.

Geri çağırma ABŞ-ın ictimai küçələrində, o cümlədən San-Fransisko və Las-Veqasda avtomatlaşdırılmış idarəetmə sistemi (ADS) ilə işləyən 332 tam avtonom nəqliyyat vasitəsini əhatə edir. Həmin şəhərlərdə “Zoox” artıq pulsuz avtonom taksi səfərləri təqdim edir.

Problem avqustun sonunda, robotaksilərdən birinin kəsişmədə dönmə zamanı qismən əks hərəkət zolağına çıxaraq qarşıdan gələn nəqliyyatın yolunda dayanması ilə aşkar edilib. Məlumatların təhlilindən sonra “Zoox” avqust–dekabr ayları arasında 62 hal müəyyən edib ki, bu zaman avtomobillər səbəbsiz olaraq fasiləsiz və ya sarı yol nişanlama xətlərini keçib və ya piyada keçidlərinin üzərində dayanaraq hərəkəti bloklayıb. Şirkət etiraf edib ki, bu manevrlər onun daxili təhlükəsizlik standartlarına uyğun deyil və qəza qeydə alınmasa da, risk səviyyəsi artıb.

Fiziki geri çağırma əvəzinə “Zoox” proqram təminatını yeniləyib. ilk yeniləmə 7 noyabrda, növbəti isə 2025-ci ilin dekabr ayının ortalarında buraxılıb. Geri çağırma 13 mart–18 dekabr 2025-ci il tarixləri arasında quraşdırılmış proqram versiyalarına aiddir və avtomobillərin bazaya qaytarılmasını tələb etmir, yeniləmələr “hava ilə” (OTA) yüklənib. Şirkət bildirib ki, bu yeniləmələr daxili analiz zamanı aşkar edilmiş yanlış davranış nümunələrini aradan qaldırır.

“Zoox” vurğulayır ki, şəffaflıq və təhlükəsizlik onun fəaliyyətinin əsas prinsipləridir və təkrar geri çağırma avtonom sistemin davamlı təkmilləşdirilməsi istiqamətində görülən işləri əks etdirir. Hadisə eyni zamanda şəhər mühitində, xüsusilə ənənəvi yol hərəkəti ilə kəsişmələrdə təhlükəsiz avtonom proqram təminatının hazırlanmasının nə qədər mürəkkəb olduğunu göstərir.

Vural Həsənoğlu