Rusiyada bir vaxtlar çox müzakirə olunan milyarder investor Aleksandr Qalitskinin keçmiş həyat yoldaşı Aliya Qalitskayanın müvəqqəti saxlanma mərkəzində həyatını itirməsi ölkə gündəmini sarsıdıb.

ERAmedia xəbər verir ki, hadisə ictimaiyyətdə “intihar, yoxsa uzun müddətdir davam edən boşanma və əmlak bölgüsü mübahisəsi ilə bağlı cinayət?” suallarını gündəmə gətirib.

İlkin məlumat Qalitskayanın vəkili vasitəsilə yayılıb. Rəsmi qurumlar isə onun qısa müddət əvvəl “yüksək məbləğli şantaj” ittihamı ilə həbs olunduğunu təsdiqləyib və həbsxana şəraitinə dair inzibati araşdırma başlatdıqlarını açıqlayıb.

Qalitskayanın saxlanılması, keçmiş əri Qalitski ilə davam edən əmlak bölgüsü məhkəməsinin ən gərgin mərhələsinə təsadüf edib. Tərəflər evliliyin hüquqi statusu məsələsində belə razılığa gələ bilmirdi. Qalitskaya tərəfi 2010-cu ildə ABŞ-da bağlanan nikahın sənədlərlə təsdiqləndiyini bildirərkən, Qalitskinin nümayəndələri Rusiya qanunvericiliyinə görə, etibarlı evliliyin heç vaxt mövcud olmadığını iddia edirdi. 46 yaşlı Qalitskayanın yüz milyonlarla rubl dəyərində daşınmaz əmlak və milyardlarla rubla çatan maliyyə aktivləri üzərində hüquq iddia etdiyi bilinirdi.

İnsan hüquqları müdafiəçiləri kamerada tapıldığı deyilən bir qeyddə Qalitskayanın ölümünə görə keçmiş ərini məsul tutduğuna dair iddiaları bölüşüblər. Həbsxana rəhbərliyi ilkin nəticələrin “intihar” ehtimalını gücləndirdiyini bildirsə də, araşdırmanın davam etdiyini vurğulayıb. Ailə üzvləri və bəzi hüquq müdafiəçiləri isə bu versiyaya ehtiyatla yanaşaraq hadisə yerinin müstəqil şəkildə araşdırılmasını tələb edir.

Qalitski müdafiə sənayesindən texnologiya sahibkarlığına qədər uzanan karyerası və “Almaz Capital Partners” vasitəsilə etdiyi investisiyalarla tanınır. İctimaiyyətdə zaman-zaman ad oxşarlığı səbəbilə qarışdırılsa da, söhbət krasnodarlı iş adamı Sergey Qalitskidən getmir. Qalitskaya ilə onun arasında evliliyin hüquqi etibarlılığı, uşaqların qəyyumluğu və yüksək məbləğli əmlak bölgüsü məsələlərində sərt hüquqi mübarizə gedirdi. Qalitskayanın məhkəmə prosesi davam edərkən “şantaj” ittihamı ilə həbs olunması işi daha da mürəkkəbləşdirmişdi.

Rəsmi qurumlar ölüm hadisəsindən sonra həbsxana standartları və nəzarət protokolları ilə bağlı inzibati araşdırmaya başlanıldığını açıqlayıb. Hüquqşünaslar bildirir ki, cinayət işi intihar versiyası ilə yekunlaşarsa, şantaj ittihamı üzrə işin bağlanması mümkündür. Bununla yanaşı, saxlanma mərkəzində təhlükəsizlik və tibbi təminat prosedurlarına dair yoxlamalar ayrıca istiqamətdə davam edə bilər.

Vural