Fransalı model Tilan Blondo altı yaşında ikən media tərəfindən “dünyanın ən gözəl qızı” adlandırılmasının həyat boyu onun üzərində böyük təzyiq yaratdığını etiraf edib. Hazırda 24 yaşı olan podium ulduzu deyir ki, insanların onu ilk növbədə adi bir insan kimi görməsini istəyir.

ERAmedia xəbər verir ki, gələcəyin modeli uşaqlıqda “Vogue Enfants” jurnalının fotosessiyasından sonra məşhurlaşıb. Onun görünüşü həmin vaxt böyük sensasiya yaradıb və şəkillər qısa müddətdə bütün dünyaya yayılıb. Lakin Tilan Blondo sonralar bildirib ki, uşaq yaşlarında bu titulun yaratdığı rezonansı tam anlamırdı.

Model xatırlayır ki, o vaxt insanlar ona tez-tez “dünyanın ən gözəl qızı” deyirdilər, lakin o buna ciddi yanaşmırdı. Onun sözlərinə görə, həmin vaxt sadəcə iPad-də oyun oynayan adi bir uşaq olduğunu düşünürdü.

Blondo deyir ki, bu gün də insanlar tez-tez ona həmin ləqəbi xatırladır. Lakin model bunu ciddi qəbul etməməyə çalışır. O bildirir ki, insanlar hələ də ona “dünyanın ən gözəl qızı” və ya “ən gözəl qadını” dedikdə, o özünü sadəcə adi bir insan və adi bir qız hesab etdiyini deyir.

Model bu yaxınlarda yenidən medianın diqqət mərkəzinə düşüb. O, fransalı DJ Ben Attal ilə nişanlandığını açıqlayıb. Blondo sosial şəbəkədə nişan üzüyü ilə fotosunu paylaşaraq “Ən yaxşı dostuma “bəli” dedim. Əbədi” sözlərini yazıb.

Tilan Blondo moda karyerasına üç yaşında başlayıb. Onu Paris küçələrində görərək diqqətə alanlar məşhur modelyer Jean Paul Gaultiernin nümayişinə dəvət ediblər.

Uğurlarına baxmayaraq, model dəfələrlə bildirib ki, moda sənayesinin sərt standartlarına uyğunlaşmaq niyyətində deyil. O qeyd edib ki, podium üçün ac qalmaq fikrində deyil və yemək istəyəndə yeməkdən çəkinmir. Model xüsusilə burgerləri sevdiyini də gizlətmir.

Hazırda Tilan Blondo model fəaliyyəti ilə yanaşı, influenser və sahibkar kimi də çalışır. Onun “Instagram” səhifəsini milyonlarla insan izləyir və model burada moda nümayişlərindən, səyahətlərdən və gündəlik həyatından görüntülər paylaşır.

Moda dünyası onu hələ də “dünyanın ən gözəl qızı” kimi xatırlasa da, Blondo üçün ən vacib şeyin xoşbəxt olmaq olduğunu vurğulayır.

Vüsalə