NATO-nun baş katibi Mark Rutte Rusiyanın qarşıdakı beş il ərzində bir alyans ölkəsinə hücum edə biləcəyini bildirib.

ERAmedia xəbər verir ki, bu barədə Rutte Almaniyada etdiyi çıxışda deyib. “Rusiya artıq cəmiyyətlərimizə qarşı gizli kampaniyasını artırır. Böyük savaşların yaşandığı dövrlərdə olduğumuz kimi hazır olmalıyıq”, – baş katib bildirib.

Qeyd edək ki, Qərb kəşfiyyat xidmətləri də bundan əvvəl oxşar xəbərdarlıqlar edib. Moskva isə bu iddiaları qətiyyətlə rədd edir.

Ruttenin xəbərdarlığı ABŞ prezidenti Donald Trampın Rusiyanın 2022-ci ilin fevralında başladığı Ukrayna işğalını sona çatdırmaq səyləri davam edərkən səsləndirilib.

Rusiya prezidenti Vladimir Putin ayın əvvəlində Avropa ilə müharibə planlarının olmadığını, lakin Avropa istəsə və ya müharibəni başlatsa, “hazır olduqlarını” bildirib. Buna baxmayaraq, Moskva 2022-ci ildə də oxşar zəmanətlər vermiş, qısa müddət sonra isə 200 min rus əsgəri Ukrayna sərhədinə yerləşdirilib.

Putin Avropa ölkələrinin Ukraynada sülhün təmin olunmasına mane olduğunu iddia edərək, Avropa müttəfiqlərinin ABŞ-ın sülh planını dəyişdirməyə çalışmasına işarə edib.

Rutte isə Berlində etdiyi çıxışda Putinin səmimi olmadığını bildirib. Ukraynanı dəstəkləməyin Avropa təhlükəsizliyinin təminatı olduğunu vurğulayıb: “Putin istəsəydi, Ukrayna Rusiya işğalı altında olardı. Rusiya qüvvələri NATO sərhədinə daha geniş şəkildə yerləşərdi və bizə qarşı silahlı hücum riski xeyli artırdı”.

Rutte bildirib ki, NATO-nun hazırkı müdafiə gücü hələ kifayətdir, amma müharibə artıq Avropanın çox yaxınlığındadır. Buna baxmayaraq, çox adam hələ də laqeyddir və vəziyyətin nə qədər təcili olduğunu düzgün anlamırlar.

Baş katib başçısı deyib ki, NATO-nun müdafiə xərcləri və istehsalı sürətlə artırılmalıdır: “Silahlı qüvvələrimizin bizi təhlükəsiz saxlamaq üçün lazım olan hər şeyə malik olması vacibdir”.

Rusiya iqtisadiyyatı artıq üç ildən çoxdur ki, müharibə rejimindədir. Ölkə dron, raket və artilleriya sursatlarının istehsalını davamlı olaraq artırır. Kiel Dünya İqtisadiyyatı İnstitutunun hesabatına görə, Rusiya hər ay təxminən 150 tank, 550 zirehli döyüş maşını, 120 “Lancet” tipli dron və 50-dən çox artilleriya sistemi istehsal edir.

NATO 30 Avropa ölkəsini, o cümlədən ABŞ və Kanadanı əhatə edir. Trampın təzyiqi ilə üzv ölkələr hərbi xərcləri artırmaq öhdəliyi götürüblər.

Buna baxmayaraq, İngiltərə və digər Qərb müttəfiqləri bu istehsal səviyyəsinin gerisində qalır. Analitiklər hesab edir ki, Qərbi Avropanın Rusiya istehsal potensialına yetişməsi illər tələb edəcək.

Fransa və Almaniya yaxın vaxtlarda 18 yaşlılar üçün könüllü hərbi xidmət sistemini bərpa edib.

Bu il Avropadakı NATO ölkələrinə qarşı kibertəhlükələr, dezinformasiya və pilotsuz uçan aparatların (PUA) istifadəsi kimi “hibrit müharibə” və ya “boz zona” taktikaları da intensivləşib.

Ekspertlər bildirir ki, bu fəaliyyətlərin heç biri, Rusiyanın bir NATO ölkəsinə birbaşa hərbi hücum etməsi ilə yaranacaq böhranın təsiri qədər ciddi deyil. Xüsusilə torpaq itkiləri və insan tələfatı baş verərsə, bu vəziyyət daha da təhlükəli olacaq.

ERAmedia Analitik Qrupu