Mənim müşahidəmə görə, Azərbaycan cəmiyyətində gərginliyin əsas səbəbləri bunlardır:

Sosial şəbəkələr hər kəsi başqasının uğuru ilə üz-üzə qoyur. İnsan artıq öz həyatını yox, başqasının “vitrin həyatını” yaşayır. Nəticədə maddi təminatı olan şəxs belə özünü geridə hiss edir.

Bir çox insan bu gün yaxşı yaşayır, amma sabahın necə olacağından əmin deyil. Psixologiyada buna “gələcək qeyri-müəyyənliyi stresi” deyilir. İnsan qazandığını itirməkdən daha çox qorxur.

Keçmişdə insanlar ailə, məhəllə, dostluq və mənəvi bağlarla daha çox qidalanırdı. Bu gün isə uğur çox vaxt yalnız pul və statusla ölçülür. Pul artdıqca mənanın azalması paradoksu yaranır.

Bir çox insanlar həyatlarını inkişaf yox, yarış kimi yaşayırlar. Yarışın sonu isə yoxdur. Daha böyük ev, daha bahalı maşın, daha yüksək vəzifə… Beyin heç vaxt “çatdım” siqnalı vermir.

Neyropsixoloji tədqiqatlar göstərir ki, insan beyni təhlükələri və çatışmazlıqları uğurlardan daha tez görməyə proqramlaşdırılıb. Şükranlıq isə təbii deyil, məşq olunan bir bacarıqdır. Məşq edilməyəndə insanın diqqəti avtomatik olaraq çatışmayanlara yönəlir.

Bəxtiyar BƏXTİYAROV,
İdarəetmə və biznes üzrə təlimçi-konsultant