Pelenin 1958-ci il Dünya Kuboku finalında geyindiyi forma 4,5 milyon funt sterlinqə hərraca çıxarılacaq.

ERAmedia xəbər verir ki, bu, 17 yaşlı Pelenin İsveçə qarşı həlledici matçda geyindiyi 10 nömrəli ikonik mavi Braziliya formasıdır.

Finalda gələcək futbol kralı iki qol vuraraq Braziliyanın 5-2 hesabı ilə qalib gəlməsinə və tarixdə ilk dəfə dünya çempionu olmasına kömək etmişdi.

“Sotheby’s” hərrac evi bu lotun indiyə qədər hərracda satılan ən bahalı futbol əsərlərindən biri olacağını gözləyir. Pelenin forması əvvəllər 2004-cü ildə Londonda “Christie’s” hərracında 59.000 funt sterlinqə satılmışdı. İndi onun dəyəri təxminən 100 dəfə arta bilər.

Qeyd edək ki, Ən bahalı futbol forması Dieqo Maradonanın 1986-cı il Dünya Kubokunda “Tanrının Əli” qolunu vurduğu forma olaraq qalır. 2022-ci ildə o, 9,3 milyon dollara satılıb.