Azərbaycan musiqi mühitində “Oqtayçik” ləqəbi ilə tanınan Oqtay Əhmədov uşaqlıqdan ədəbiyyata maraq göstərib, ilk şeirlərini məktəb yaşlarında yazmağa başlayıb. Musiqi təhsili olmasa da, sonralar öz istedadı hesabına mahnılar bəstələyərək toy səhnələrində tanınan simaya çevrilib.

ERAmedia xəbər verir ki, Oqtay Əhmədovun ən məşhur nümunələrindən biri sayılan “Azəri torpağı” şeiri bir vaxtlar qəzet müsabiqəsinə göndərilsə də, həmin dövrdə dərc olunmayıb. İllər sonra isə bu mətn musiqiləşdirilərək geniş yayılıb və xüsusilə Eyyub Yaqubov tərəfindən ifa edildikdən sonra böyük populyarlıq qazanıb.

Oqtay Əhmədovun yaradıcılığı əsasən toy mərasimləri ilə bağlı olub. O, tez-tez sifarişlə həm gəlin, həm də bəy üçün yerindəcə mahnılar bəstələyir, qısa zamanda yeni melodiyalar yaradırdı. Ailəsinin sözlərinə görə, o, hər bir övladına ayrıca mahnı həsr edib və şəxsi hisslərini musiqiyə çevirib.

1978-ci ildə qızı Cəmiləyə həsr etdiyi “Cəmilə qızım Cəmilə” mahnısı sonradan xalq arasında geniş yayılıb və bir çox ifaçılar tərəfindən səsləndirilib. Bu ifalar arasında Elariz Məmmədoğlu tərəfindən oxunması da mahnının populyarlığını daha da artırıb.

Müxtəlif dövrlərdə onun mahnıları kasetlər vasitəsilə yayıldığı üçün hətta xaricdə də tanınıb. Sənətçi Səməd Səmədov bir xatirəsində İsraildə taksidə “Oqtayçik” mahnılarının səsləndiyini gördüyünü qeyd edib ki, bu da onun musiqisinin geniş yayılmasını göstərib.

Xocalı faciəsi ilə bağlı xəbərlərin təsiri nəticəsində ciddi stress keçirən Oqtay Əhmədovun səhhətində problemlər yaranıb. Daha sonra beyninə qan sızması onun yaradıcılıq fəaliyyətini dayandırmasına səbəb olub. Səhnədən uzaqlaşan sənətçi maddi səbəblərdən yeni işə yönələrək avtomobil dayanacağı açmağa məcbur qalıb.

2008-ci ilin avqust ayında vəfat edən Oqtay Əhmədov Azərbaycan musiqi mühitində toy mahnıları ilə yadda qalan, xalq arasında “Oqtayçik” kimi tanınan fərqli bir yaradıcı fiqur kimi xatırlanır. Onun mahnıları bu gün də müxtəlif ifalarda yaşayır və nostalji hissi yaradır.

Vüsalə

Oqtay Əhmədov qızı Cəmilə ilə…