ABŞ, Rusiya və Çin arasında artan geosiyasi rəqabət beynəlxalq münasibətlər sistemində yeni strateji mərhələnin formalaşdığını göstərir.

ERAmedia-nın məlumatına görə, siyasi təhlilçi Aqşin Kərimov hesab edir ki, qlobal güclər bir-birlərinin strategiyalarını pozmaq və üstünlük qazanmaq üçün çoxşaxəli siyasi planlar həyata keçirirlər.

Siyasi təhlilçinin fikrincə, ABŞ ilə Russia arasında davam edən qarşıdurma Çin üçün qlobal nizamı dəyişdirmək baxımından mühüm imkanlar yaradır. O bildirib ki, həm Ağ Ev, həm də Moskva strateji üstünlük əldə etmək üçün Çin faktoruna xüsusi önəm verir.

Aqşin Kərimov qeyd edib ki, ABŞ prezidenti Donald Trampın Çinə səfərindən sonra Rusiya prezidenti Vladimir Putinin Pekinə planlaşdırılan səfəri geosiyasi rəqabətin texniki parametrlərindən biri kimi qiymətləndirilə bilər.

Onun sözlərinə görə, Vaşinqtonun Rusiyaya qarşı əsas strateji planı Ukrayna müharibəsi ilə başlayıb və ABŞ artıq Rusiyanın daxilində daha genişmiqyaslı kəşfiyyat əməliyyatları aparmaq potensialını qiymətləndirməyə çalışır.

Siyasi təhlilçi bildirib ki, Moskva Çinin Tayvana mümkün müdaxiləsini ABŞ-ni çətin vəziyyətə salacaq amil kimi görür. Bununla belə, o hesab edir ki, Rusiyanın ABŞ üzərində strateji üstünlük əldə etmək imkanları məhduddur.

Aqşin Kərimovun qənaətincə, Çin isə Ukrayna müharibəsi və Yaxın Şərqdəki proseslərdən istifadə edərək ABŞ-nin qlobal strategiyasını çətinləşdirməyə yönəlmiş mexanizmlər formalaşdırır. O vurğulayıb ki, Pekin Rusiyanı tam müttəfiq kimi deyil, daha çox Vaşinqtona qarşı geosiyasi vasitə kimi dəyərləndirir.

Təhlilçi hesab edir ki, Azərbaycanın Cənubi Qafqazda formalaşdırdığı yeni geosiyasi və təhlükəsizlik modeli regiona marağı artırıb. Onun fikrincə, xüsusilə ABŞ Bakı ilə münasibətləri Rusiyanın təcrid siyasətində mühüm həlqələrdən biri kimi nəzərdən keçirir.

Aqşin Kərimov əlavə edib ki, Türk Dövlətləri Təşkilatı iqtisadi potensialını siyasi və təhlükəsizlik platformasına çevirdikcə, həm ABŞ, həm də Çinin bu təşkilata münasibəti dəyişir və daha xüsusi xarakter alır. O bildirib ki, Rusiya bu proseslərin bir hissəsindən kənarda qalır.

Sonda siyasi təhlilçi vurğulayıb ki, Azərbaycan üçün əsas prioritet qlobal güc mərkəzlərinin uzunmüddətli strategiyalarını düzgün oxumaq və regionda baş verən geosiyasi dəyişikliklərin nəticələrini vaxtında qiymətləndirməkdir.

Vural