Şamaxı hər zaman irfanla, tarixlə və zəngin mədəni-mənəvi irslə aşıb-daşan məkan olub və Prezident İlham Əliyevin və birinci xanım Mehriban Əliyevanın Şamaxıya səfəri zamanı bunun müasir inkişafla uğurlu sintezi bir daha nümayiş etdirilib.

ERAmedia xəbər verir ki, bunu Milli Məclisin deputatı Elnarə Akimova Şamaxıya səfər çərçivəsində həyata keçirilən layihələri şərh edərkən deyib.

Deputat bildirib ki, səfərin ilk ünvanlarından birinin Ümummilli Lider Heydər Əliyevin Şamaxının mərkəzində ucaldılmış abidəsi olması xüsusi rəmzi məna daşıyır:

“Çünki Azərbaycanın bu gün əldə etdiyi böyük nəticələrin arxasında müasir dövlətçilik məktəbinin, milli inkişaf strategiyasının və siyasi varisliyin möhkəm təməli dayanır.

Şamaxının başqa bir siması isə turizm, istirahət, sahibkarlıq və yeni iş imkanları ilə zənginləşən müasir Şamaxıdır.

Meysəri kəndində açılışı keçirilən “Meysari Grand Hotel & SPA” kompleksi bunun konkret nümunəsidir. Dəniz səviyyəsindən 1050 metr yüksəklikdə yerləşən kompleksdə hotel və kotteclər, restoranlar, konfrans mərkəzi, sağlamlıq və SPA imkanları, idman və istirahət zonaları, uşaq əyləncə mərkəzi yaradılıb. Ümumilikdə 204 otaq, 3 villa, müxtəlif idman obyektləri və 420 nəfərlik Nəsimi Konfrans Mərkəzi burada həm turizmə, həm də işgüzar tədbirlərə xidmət göstərəcək. Ən diqqətçəkən məqamlardan biri isə 320 yeni iş yerinin yaradılmasıdır.

Burada rayon iqtisadiyyatına yeni nəfəs, yerli məşğulluğa əlavə imkan, Şamaxının turizm xəritəsində daha möhkəm mövqe qazanması perspektivi var.

Pirqulu qəsəbəsində istifadəyə verilən “Pirqulu Park” hotelinin miqyası da Şamaxının turizm potensialının hansı istiqamətdə inkişaf etdiyini göstərir. 16 hektar ərazidə yerləşən kompleksə iki hotel binası, 175 nömrə və 2 kottec daxildir və eyni vaxtda 366 qonağın yerləşdirilməsi mümkündür. Burada restoran və kafelərlə yanaşı, görüş və təlimlər üçün zal, 600 nəfərlik konqres binası, uşaq əyləncə mərkəzi və amfiteatr da yaradılıb.

Deməli, Şamaxıda turizm artıq yalnız “gəlib-görmək” anlayışından çıxaraq, yaşamaq, istirahət etmək, tədbir keçirmək, ailə ilə vaxt keçirmək və regionun iqtisadi həyatına qoşulmaq imkanlarını özündə birləşdirən bütöv bir sahəyə çevrilir.

Amma Şamaxının bugünkü mənzərəsini yalnız yeni tikililərlə ifadə etmək doğru olmaz. Çünki bu qədim torpağın ruhu onun tarixindədir.

Prezident İlham Əliyev və birinci xanım Mehriban Əliyevanın “Nəsimi Bağları” kompleksi ilə tanışlığı da məhz bu baxımdan xüsusi məna daşıyır. Burada turizm, mədəniyyət və istirahət bir məkanda birləşdirilib. Şamaxının qədim və müasir tarixini əks etdirən muzey, ailəvi istirahət və əyləncə məkanları, turistlər üçün informasiya mərkəzi, müxtəlif incəsənət nümunələri, tematik evlər və 9 metr hündürlüyündə baxış qülləsi yaradılıb. Kompleksdə Azərbaycanda ilk və yeganə ixtisaslaşmış kapibara fermasının – “Capybara Land”in də fəaliyyət göstərməsi məkanın xüsusiyyətlərindən biridir.

Burada diqqət çəkən məqam odur ki, müasir turizm keçmişi kölgədə qoymur, əksinə, onunla yanaşı inkişaf edir. Şamaxının tarixi, mədəniyyəti və təbiəti müasir xidmət imkanları ilə bir araya gətirilir.

Bu düşüncənin ən təsirli ünvanlarından biri isə Avaxıl kəndindəki Pir Ömər Sultan ziyarətgahıdır.

XIV əsrin ortalarına aid türbə qalıqlarının aşkar edildiyi, xəlvətilik təliminin banisi Pir Ömər Avaxılı ilə əlaqəsi arxeoloji tapıntılarla təsdiqlənən bu tarixi məkanın qorunması görülən işlərin nəticəsini nümayiş etdirir. Prezident İlham Əliyev və birinci xanım Mehriban Əliyeva 2020-ci ildə Şamaxıya səfərləri zamanı burada olmuş, konservasiya işlərinin aparılması ilə bağlı tapşırıqlar vermişdilər. Bu gün isə həmin işlərin nəticələri ilə tanış olublar.

Ziyarətgahın qalıqları konservasiya edilib, ərazidə aşkar olunan qəbirlər səliqəyə salınıb, abidənin və ətrafının qorunması üçün mühafizə divarı yaradılıb, ziyarətçilər üçün gəzinti zolağı salınıb. Bütün bunlar tarixi abidənin sadəcə qorunması deyil, onun gələcək nəsillərə çatdırılması deməkdir.

Beləliklə, sentyabrın 17-də Şamaxıda bir-birindən fərqli görünən, əslində isə vahid bir inkişaf fəlsəfəsini tamamlayan mənzərə yarandı: Heydər Əliyevin abidəsi – dövlətçilik yaddaşı, Pir Ömər Sultan ziyarətgahı – tarixi-mənəvi irs, Nəsimi Bağları – mədəniyyət və müasir turizm, Meysəri və Pirqulu isə sahibkarlıq, məşğulluq və yeni turizm imkanları.

Şamaxının siması dəyişir, amma yaddaşı dəyişmir.

Əksinə, yenilənən Şamaxı öz tarixini daha görünən, daha əlçatan və daha yaşanılan edir. Burada yeni hotel tikilir, amma qədim ziyarətgah da qorunur. Müasir istirahət məkanı yaradılır, amma Nəsiminin adı yaşadılır. Turizm infrastrukturu genişlənir, amma təbiətin və tarixi mühitin qorunmasına diqqət yetirilir.

Bəlkə də bu səfərin ən mühüm mesajı elə budur: inkişaf keçmişi silmək deyil, keçmişin üzərində gələcəyi qurmaqdır.

Şamaxı bu gün öz tarixindən güc alan, təbiətini və mədəni irsini qoruyaraq müasir Azərbaycanın inkişaf xəritəsində yeni mövqelər qazanan bir bölgə kimi görünür. Bu amillər Şamaxını Azərbaycanın keçmişdən gələcəyə uzanan canlı yaddaşına çevirir”.

Əli Fərhad