Təcrübə göstərir ki, süni intellekt (Sİ) əsasında işləyən stetoskoplar «həqiqi inqilab» ola bilər və potensial olaraq ürək çatışmazlığı, ürək qapağı xəstəlikləri və ritm pozğunluqları (atrial fibrillyasiya kimi tanınır) olan xəstələrin daha erkən müalicə almalarına imkan yarada bilər.

Tədqiqatçılar aşkar ediblər ki, yeni texnologiyadan istifadə edən xəstələrdə növbəti 12 ay ərzində ürək çatışmazlığının müəyyən olunma ehtimalı istifadə etməyənlərə nisbətən 2,3 dəfə daha yüksəkdir.

Simptomları olmasa da insult riskini artıran ürək ritmi anomaliyaları stetoskoplarla 3,5 dəfə daha tez aşkar edilib, ürək qapağı xəstəlikləri isə 1,9 dəfə daha çox aşkarlanıb.

Qurğuların iş prinsipi xəstənin döş qəfəsinə kart ölçüsündə monitor yerləşdirməkdən ibarətdir. Bu monitor ürəkdən gələn elektrik siqnallarını ölçmək üçün elektrokardioqram (EKQ) götürür və ürəkdən keçən qan səslərini qeyd etmək üçün mikrofon istifadə edir. Daha sonra hər iki məlumat dəsti buluda göndərilir və on minlərlə xəstədən toplanmış oxşar məlumatlar əsasında öyrədilmiş süni intellekt tərəfindən təhlil edilir.

Xatırladaq ki, ənənəvi stetoskop 1816-cı ildə  həkim Rene Laennec tərəfindən insan bədəninin daxili səslərini dinləmək üçün ixtira edilmişdir. Bu cihaz xəstənin ürək və ağciyər səslərini daha dəqiq eşitməyə imkan verirdi. Laennecin ixtirası müasir tibbdə diaqnostik metodların inkişafında böyük rol oynayıb və həkimlərin xəstələri daha etibarlı şəkildə qiymətləndirməsinə şərait yaradıb.