Azərbaycan televiziya tarixində mühüm yer tutan Natəvan Hacıyeva bu gün ehtiramla anılır.

ERAmedia xəbər verir ki, o, hələ gənc yaşlarında keçirilən seçim mərhələsində yüzlərlə namizəd arasından fərqlənərək peşəkar diktor kimi fəaliyyətə başlamışdı.

1960-cı illərin əvvəllərində televiziya sahəsində keçirilən müsabiqədə seçilən Natəvan Hacıyeva həmin dövrdə efirə çıxan ilk simalardan biri oldu və qısa müddətdə tamaşaçı rəğbəti qazandı. Onun televiziya fəaliyyətinə başlaması ilə xüsusi diktor ştatı yaradılmış, bu isə ölkədə peşəkar aparıcılığın formalaşmasına töhfə vermişdi.

Sənət yolunda yalnız televiziya ilə kifayətlənməyən Natəvan Hacıyeva kino sahəsində də özünü sınayıb. O, tanınmış rejissor Kamil Rüstəmbəyovun ekran işlərindən birində kiçik rol alaraq yaradıcılığını genişləndirmişdi.

Eyni zamanda, ədəbiyyata maraq göstərən diktor müxtəlif tədbirlərdə öz qələmindən çıxan şeirləri səsləndirirdi. Onun çıxışlarından biri də görkəmli şairə Xurşidbanu Natəvanın abidəsinin açılışı zamanı olub.

Natəvan Hacıyeva müsahibələrində tez-tez sadəliyini vurğulayır, xarici görünüşdən daha çox peşəkarlığın önəmli olduğunu bildirirdi. Onun fikrincə, uğurun əsas səbəbi təbii davranış və işə olan məsuliyyət idi.

Uzun illər televiziya ekranlarında çalışan Natəvan Hacıyeva Azərbaycan efir mədəniyyətinin inkişafında önəmli rol oynayan simalardan biri kimi yadda qalıb.

Vüsalə