ABŞ Fars körfəzi ölkələrində təsirini itirə bilər.

ERAmedia xəbər verir ki, bu barədə “Foreign Policy” nəşri yazır.

Nəşr qeyd edir ki, İranın bu ölkələrdəki obyektlərə hücumları Vaşinqtonun onları qorumaq imkanlarının məhdud olduğunu bir daha göstərir.

Məqalədə bildirilir ki, İranın Fars körfəzi regionundakı qonşu dövlətlərə endirdiyi zərbələr həmin ölkələri qaçmaq istədikləri müharibəyə getdikcə daha çox cəlb edir. Birləşmiş Ərəb Əmirlikləri, Qətər və Səudiyyə Ərəbistanının İsrail və ABŞ-la birlikdə birbaşa müharibəyə qoşulması ehtimalı Vaşinqtonun onilliklərdir nəzarət etdiyi Yaxın Şərq nizamı ilə bağlı ambisiyalarının ilk genişmiqyaslı təzahürü kimi qiymətləndirilir.

Nəşrin yazdığına görə, Vaşinqton uzun müddət Fələstin məsələsini həll etmədən ərəb ölkələri ilə İsrail arasında İran əleyhinə əməkdaşlıq yaratmağa çalışıb. Lakin Fars körfəzi dövlətləri artıq ABŞ-ın onları mövcud təhlükələrdən qorumaq imkanına və ya istəyinə əvvəlki kimi inanmır.

Məqalədə vurğulanır ki, bu ölkələr İsrail ilə açıq əməkdaşlığa məcbur olsalar belə, zaman keçdikcə onu potensial müttəfiq deyil, daha çox təhlükə kimi görməyə başlaya bilərlər.

Bildirilib ki, ABŞ və İsrailin hücumlarına cavab olaraq İranın Fars körfəzi ölkələrinə zərbələri son üç ildə formalaşmış regional yaxınlaşmanı da sarsıdıb. Qeyd olunur ki, Səudiyyə Ərəbistanı və Birləşmiş Ərəb Əmirlikləri uzun müddət İran məsələsində İsraili dəstəkləyiblər.

Məqalədə həmçinin bildirilir ki, Səudiyyə Ərəbistanının vəliəhdi Məhəmməd bin Salman hakimiyyətinin ilk illərində İranı sərt şəkildə tənqid edib və hərbi addımların mümkünlüyünə işarə verib. Fars körfəzi ölkələrinin liderləri uzun müddət İrana qarşı daha sərt siyasətin tərəfdarı olub və nüvə diplomatiyasına skeptik yanaşıblar. Bu dövrdə onların müttəfiqləri İraq və Yəməndə İranın təsirinə qarşı mübarizə aparıblar.

Vural