Müasir smartfon telefonlar güclü litium-ion batareyalarla təchiz olunur və əksər hallarda etibarlı işləyir. Lakin istehsal qüsuru, köhnəlmə və ya xarici zədələr səbəbindən batareya bəzən həddindən artıq qızaraq hətta alışa bilər.

ERAmedia bildirir ki, bu hallar nadir olsa da, düzgün davranış qaydalarını bilmək vacibdir . Bu, xəsarət və ciddi maddi ziyanın qarşısını ala bilər.

Smartfonlar niyə yanır?

Əsas səbəb batareya ilə bağlı problemlərdir. Zamanla batareyada kimyəvi proseslər pozulur, qazlar ayrılır, batareya şişir, korpus deformasiyaya uğrayır. Bu isə qısaqapanmaya və nəzarətsiz istilik ayrılmasına gətirib çıxara bilər.

Riski artıran amillər:

zavod qüsuru (Samsung Galaxy Note 7 hadisəsi buna nümunədir);

yerə düşmə nəticəsində mexaniki zədələr;

suyun daxil olması;

kəskin temperatur dəyişiklikləri;

xüsusilə enerji yığılması zamanı tez-tez baş verən qızmalar;

orijinal olmayan və ya nasaz adapterlər və kabellərdən istifadə.

İlk addımlar: elektrikdən ayırın və izolyasiya edin

Əgər smartfon tüstülənməyə, xışıltı və ya fit səsi çıxarmağa başlayıbsa:

Dərhal şarj qurğusunu rozetkadan çıxarın. Bu mümkün deyilsə, elektrik şitindən bütün mənzili cərəyansız edin.

Cihazı tez alışan əşyalardan uzaqlaşdırın. Ən yaxşısı onu bayıra çıxarıb asfalt, beton və ya torpaq üzərinə, insanlardan və heyvanlardan uzaq yerə qoymaqdır. Pəncərədən atmayın və yol uzundursa, mənzilin içi ilə daşımağa çalışmayın.

Bayıra çıxarmaq mümkün deyilsə, telefonu yanmayan səthin (kafel, metal, beton) üzərinə, mebel, pərdələr və qaz cihazlarından təhlükəsiz məsafədə yerləşdirin.

Yanan smartfonu necə söndürməli?

Ən yaxşı variant odsöndürən balondur (elektrik avadanlıqları üçün nəzərdə tutulmayan su əsaslı növlər istisna olmaqla).

Odsöndürən yoxdursa:

Cihazın üzərinə bol miqdarda çörək sodası və ya gül qabından torpaq tökün.

Alovun qarşısını və oksigenin girişini məhdudlaşdırmaq üçün qalın (sintetik olmayan) parça ilə örtün.

Metal qazan və ya qapaqla smartfonu örtərək alovun izolyasiya olunmuş mühitdə sönməsini təmin edin.

Su ilə söndürmək olarmı?

Litium-ion batareyalarda təmiz litiumun miqdarı çox azdır, buna görə də metal litiumda olduğu kimi şiddətli hidrogen ayrılması baş vermir. Su istifadə etmək olar, amma bu ən yaxşı seçim deyil.

Əgər başqa vasitə yoxdursa:

Smartfonu bir qaba və ya vannaya qoyun.

Soyuq sudan istifadə edin. Bu, batareyanı daha tez soyudar.

Suyu bərabər və davamlı şəkildə tökün, hamısını birdən boşaltmayın.

Alov sönəndən sonra belə, yenidən alışmanın qarşısını almaq üçün bir neçə dəfə su tökün.

Təhlükəsizlik tədbirləri

Tüstünü udmayın, onun tərkibində zəhərli maddələr var. Burnu və ağzı parça ilə örtün və ya nəfəsi saxlayın.

Alov yayılırsa və ya söndürmək mümkün deyilsə, dərhal ərazini tərk edin və yanğınsöndürənləri çağırın (101 və ya 112). Smartfonu xilas etmək mümkün olmaya bilər, sağlamlıq isə hər şeydən önəmlidir.

Telefon cibdə və ya çantada alışıbsa, yanıq riskinə görə əllə çıxarmağa çalışmayın. Onu tez bir zamanda yerə silkələmək daha təhlükəsizdir.

Yanğının qarşısını necə almaq olar?

Batareyanın şişməsi kimi ilk əlamətlərdə (korpusun və ya ekranın deformasiyası) istifadəni dayandırın və dəyişdirilməsi üçün servisə müraciət edin.

Yalnız orijinal və ya sertifikatlaşdırılmış şarj qurğularından istifadə edin.

Həddindən artıq qızma, kəskin temperatur dəyişiklikləri və güclü zərbələrdən qoruyun.

Batareyanı özünüz açmağa və ya təmir etməyə çalışmayın.

Qeyd edək ki, problemin qarşısını almaq daha asan və ucuzdur. Batareyanın vəziyyətinə nəzarət edin, keyfiyyətli adapterlərdən istifadə edin və cihazı zədələrdən qoruyun. Bu halda risk minimuma enəcək.

Vüsalə