Yaponiya hökuməti Çində yaşayan və ya ölkəyə səfər edən öz vətəndaşları üçün yeni təhlükəsizlik xəbərdarlığı yayıb. Bu addım Tokio ilə Pekin arasında son günlərdə daha da kəskinləşən diplomatik gərginlik fonunda atılıb.

ERAmedia xəbər verir ki, Yaponiya hökuməti Çində yaşayan və ya ölkəyə səfər edən öz vətəndaşları üçün yeni təhlükəsizlik xəbərdarlığı yayıb. Bu addım Tokio ilə Pekin arasında son günlərdə daha da kəskinləşən diplomatik gərginlik fonunda atılıb.

Yaponiya səfirliyinin məlumatına görə, Çindəki bütün Yapon vətəndaşlarına insidentlərdən yayınmaq üçün yüksək ehtiyatlılıq nümayiş etdirmək, izdihamlı məkanlardan uzaq durmaq, tək gəzməmək və ətraf mühiti diqqətlə izləmək tövsiyə olunub. Xüsusilə ailəsi və uşaqları ilə səyahət edənlərə daha diqqətli olmaq çağırışı edilib.

Xatırladaq ki, gərginliyin əsas səbəbi Yaponiya baş naziri Sanae Takaichinin Tayvana dair sərt bəyanatları olub. O, bildirib ki, əgər Çin Tayvana qarşı hərbi əməliyyata başlasa və bu, Yaponiyanın təhlükəsizliyinə təhdid yaratsa, Tokio buna cavab verməyə məcbur olacaq. Pekin bu açıqlamaları sərt tənqid edərək Yaponiyanı daxili işlərinə qarışmaqda ittiham edib.

Diplomatik münasibətlərdə gərginlik dərinləşdikcə, Çin tərəfi bir sıra mədəni tədbirləri, o cümlədən Yapon filmlərinin yerli kinoteatrlarda nümayişini dayandırıb. Arkasında isə Çin ictimaiyyətinin Yaponiyaya qarşı artan neqativ reaksiyası dayanır.

Hazırda Yaponiyanın yüksək səviyyəli diplomatları Pekində vəziyyəti yumşaltmaq üçün danışıqlar aparırlar. Tokio tərəfi ümid edir ki, qarşılıqlı dialoq gərginliyin azaldılmasına kömək edəcək.

Ekspertlərin fikrincə, Tayvan məsələsi ətrafında böyüyən regional qarşıdurma təkcə Çin və Yaponiyanı deyil, bütün Asiya-Sakit okean regionunu risk altında qoyur. Buna görə ölkələr arasındakı diplomatik nüanslar daha geniş geosiyasi dinamikaya təsir edir.