ERAmedia xəbər verir ki, qəbul zamanı rektor Nurəli Yusifbəyli tədris və elmi fəaliyyət sahəsində təcrübə mübadiləsinin hər iki tərəf üçün faydalı olacağını vurğulayıb. SDU müəllimlərinin Atırau Universitetindəki oxşar proqramda iştirakını xatırladan rektor, bu əməkdaşlığın artıq konkret nəticələr verdiyini bildirib. O, hər iki ali təhsil müəssisəsi alimləri tərəfindən birgə hazırlanması nəzərdə tutulan “Azərbaycan-Qazaxıstan iqtisadi əlaqələrinin strateji aspektləri” adlı kollektiv monoqrafiyanın bu formatda ilk layihə olduğunu diqqətə çatdırıb. Qeyd olunub ki, əsas hədəf ölkələr arasındakı iqtisadi əlaqələrin elmi-nəzəriyyədən praktik müstəviyə keçməsini təmin etməkdir.

Atırau Universitetinin nümayəndə heyətinin rəhbəri, İqtisadiyyat və hüquq fakültəsinin dekanı, dosent Rayxan Utaliyeva səmimi qəbula görə rektor Nurəli Yusifbəyliyə təşəkkür edib. O, Atırau Universitetinin rektoru, professor Salamat İdrisovun salamlarını SDU-nun rektoruna çatdıraraq universitetlə bağlı xoş təəssüratlarını bölüşüb.

Qeyd edək ki, iki həftəlik proqram çərçivəsində seminar, dəyirmi masa, elmi müzakirə və birgə akademik görüşlərin keçirilməsi nəzərdə tutulur.