Bu fikirləri ERAmedia-ya açıqlamasında Siyasi şərhçi Araz Balayev deyib. O bildirib ki: “Azərbaycan Prezidentinin Qəbələdə kerçirilən TDT-nin Dövlət Başçıları Şurasının 12-ci Zirvə Görüşündə çıxışı zamanı bu məqama diqqət çəkməsi təsadüfi deyildi. İndi Türk Dövlətləri dünya siyasətinin və ticarətinin tam mərkəzində özünə yer edib. Rusiya zəifləyir, Avropa İttifaqı, ABŞ və Çin isə türklərlə dil tapmağa çalışır. Bəli məhz dil tapmağa, çünki onlarla hədə-qorxu dili ilə danışmaq mümkün deyil. Türk Dövlətləri Təşkilatı bu qəliz geosiyasi vəziyyətdə birgə qərarlar verməyə və ortaq hərəkət etməyə imkan yaradır. Bu isə Rusiya, ABŞ, Avropa İttifaqı və Çinin yox, məhz türk dövlətlərinin maraqlarının qorunması deməkdir”.

Araz Balayev onu da  qeyd edib ki, bununla yanaşı türk dövlətləri qlobal oyunçuları özündən kənarlaşdırmır, əksinə maraqları çərçivəsində onlarla əməkdaşlıq edir. “Şimalda Rusiya, cənubda isə Əfqanıstan, İran, Pakistan və Hindistanda vəziyyət göz qabağındadır. Aktiv və hər an başlaya biləcək müharibələr onlar vasitəsilə ticarəti mümkünsüz edir. Yalnız TDT-yə üzv ölkələr bu vəziyyətdə təhlükəsiz və etibarlı tərəfdaş kimi çıxış edir. Təşkilat isə öz əhəmiyyətini anlayır və addımlarını buna görə atır”.