Zəngilanın işğaldan azad edilməsi Azərbaycanın hərbi-strateji mövqelərinin güclənməsində mühüm rol oynayıb.

ERAmedia-nın məlumatına görə, Milli Məclisin deputatı Sahib Alıyev bildirib ki, Zəngilanın azad edilməsi ilə İranla dövlət sərhədimizin daha 132 kilometri düşməndən təmizlənərək tam bərpa olunub. Onun sözlərinə görə, bu hadisə Ermənistan ordusunun cənub qruplaşmasının iflic olması, eləcə də Şuşa və Laçına aparan strateji yolların açılması baxımından mühüm əhəmiyyət daşıyıb.

Deputat Zəngilanın azad edilməsi zamanı Azərbaycanın suverenliyinə qarşı çıxan qüvvələrin mövqeyini də sərt tənqid edib. O qeyd edib ki, işğalçıya dəstək verən qüvvələr Azərbaycan Ordusunun irəliləməsinə mane olmağa çalışıblar. Sahib Alıyev vurğulayıb ki, işğal dövründə Zəngilanda beş məscidin və dörd ziyarətgahın dağıdılması həmin qüvvələrin əməllərinə münasibətdə ciddi suallar doğurur.

Sahib Alıyev bildirib ki, Azərbaycan Ordusunun və Dövlət Sərhəd Xidmətinin xüsusi təyinatlılarının qarşısında tab gətirə bilməyən qüvvələr Araz çayını keçərək geri çəkiliblər. Deputatın fikrincə, bu müqavimət cəhdləri Zəngilanın azadlığı uğrunda mübarizəni daha da çətinləşdirib.

Deputatın diqqətə çatdırdığına görə, Zəngilanın azad olunmasına görə 6 974 hərbi qulluqçu müvafiq medalla təltif edilib. Təltif olunanlar arasında döyüşlərdə şəhid olan hərbi qulluqçular da var.

Sahib Alıyev Zəngilanın azadlığı uğrunda canlarından keçən şəhidlərin xatirəsini dərin minnətdarlıqla yad edib, medalla təltif olunan hərbçilərin xidmətlərini yüksək qiymətləndirib.

Deputat çıxışını Azərbaycanın müstəqilliyinin, ərazi bütövlüyünün və təhlükəsizliyinin qorunmasının vacibliyini vurğulayan fikirlərlə yekunlaşdırıb.

Əli Fərhad