San-Fransiskoda dünən axşam şəhərin təxminən üçdə birini əhatə edən genişmiqyaslı elektrik kəsintisi baş verib. Elektrik kəsintisi nəticəsində təxminən 130 min ev və iş yeri işıqsız qalıb və bir çox məhəllələr qaranlığa qərq olub.

ERAmedia xəbər verir ki, böyük bir transformatorun partlaması nəticəsində yaranan elektrik kəsintisi bütün avtomobillərin hərəkətsiz qalmasına səbəb olub. İnsanlar vəziyyətə müdaxilə edə bilməyib və şəhərdə tıxac yaranıb.

Hadisə nəticəsində restoran və dükanlar bağlanıb, elektrik kəsintisi ictimai nəqliyyatda da pozuntular yaradıb və bəzi stansiyalar fəaliyyətini dayandırıb. Bütün avtomobillər elektrik kəsintisi ilə bir anda dayanıb, yollarda uzun növbələr yaranıb.

San-Fransisko Fövqəladə Hallar İdarəsi şəhər üzrə nəqliyyatda pozuntuların olduğunu bildirərək vətəndaşlara lazımsız səyahətlərdən çəkinmələrini tövsiyə edib.

Sahəyə xidmət göstərən “Pacific Gas and Electric” (PG&E) şirkətindən verilən açıqlamada kəsintinin bir hissəsinin transformatorun partlaması və böyük zərər vurması səbəbindən baş verdiyi bildirilib. Açıqlamada kəsintinin səbəblərinin araşdırıldığı və elektrik enerjisinin bərpası üçün işlərin davam etdiyi qeyd olunub.

CNBC-nin xəbərinə görə, sosial şəbəkələrdə San-Fransiskodakı kəsinti səbəbindən “Waymo” avtomobillərinin yollarda qaldığı anlar paylaşılıb.

“Google”ın ana şirkəti “Alphabet” tərəfindən yaradılmış “Waymo” şirkətindən verilən açıqlamada isə San-Fransisko Bay bölgəsində kəsinti səbəbindən sürücüsüz avtomobil çağırma xidmətinin dayandırıldığı bildirilib.

Açıqlamada heyətin şəhər rəsmiləri ilə əməkdaşlıq etdiyini və yaxın vaxtlarda xidmətlərin yenidən bərpa olunacağı ümidinin olduğu qeyd edilib.

Vural