Kolumbiyada keçirilən prezident seçkilərinin ilk turunda heç bir namizəd tələb olunan səs çoxluğunu toplaya bilmədiyi üçün seçki ikinci mərhələyə keçib. Bülletenlərin böyük hissəsinin sayılmasına əsasən, yarışda ilk iki yeri ifrat sağçı Abelardo de la Espriyelya ilə hakimiyyət blokunun namizədi İvan Sepeda tutub.

ERAmedia xəbər verir ki, Milli Vətəndaş Vəziyyəti Reyestrinin açıqladığı ilkin nəticələrə görə, seçki qutularının 96 faizi açılıb.

Nəticələrə əsasən, “Vətənin Müdafiəçiləri” Hərəkatının namizədi, ifrat sağçı Abelardo de la Espriyelya səslərin 43,62 faizini toplayaraq ilk turu lider kimi başa vurub.

Hakim “Tarixi Alyans”ın solçu namizədi İvan Sepeda isə səslərin 41,13 faizini qazanaraq ikinci yerdə qərarlaşıb.

Keçmiş prezident Alvaro Uribenin rəhbərlik etdiyi Demokratik Mərkəz Partiyasının namizədi Paloma Valensiya 6,86 faiz səslə üçüncü olub. Onu 4,20 faizlə Antiokiyanın sabiq qubernatoru Serxio Fakhardo, 0,95 faizlə isə “Sistemi Dağıtmaq Hərəkatı”nın namizədi Raul Santyaqo Botero izləyib.

Heç bir namizəd 50 faizdən çox səs toplaya bilmədiyi üçün ən çox səs qazanan ifrat sağçı Abelardo de la Espriyelya ilə solçu namizəd İvan Sepeda iyunun 21-də keçiriləcək ikinci turda Kolumbiyanın yeni prezidenti olmaq uğrunda mübarizə aparacaqlar.

Vural