Rusiya Prezidenti Vladimir Putin iyunun 4-də Sankt-Peterburq Beynəlxalq İqtisadi Forumu çərçivəsində dünyanın aparıcı informasiya agentliklərinin rəhbərləri ilə görüş keçirəcək.

ERAmedia xəbər verir ki, bu barədə jurnalistlərə Rusiya Prezidentinin köməkçisi Yuri Uşakov məlumat verib.

Onun sözlərinə görə, görüş Rusiyanın daxili və xarici siyasətinin aktual məsələlərinə, eləcə də beynəlxalq gündəmdə yer alan əsas hadisələrə həsr olunacaq.

Ənənəvi olaraq, forum çərçivəsində keçirilən bu tədbir TASS agentliyi tərəfindən təşkil olunur. Rusiya Prezidentinin dünyanın aparıcı media qurumlarının rəhbərləri ilə builki görüşü yubiley xarakteri daşıyacaq və 10-cu dəfə keçiriləcək.

Bundan başqa, Vladimir Putin Sankt-Peterburq Beynəlxalq İqtisadi Forumunun plenar iclasında geniş məruzə ilə çıxış edəcək, müzakirələr zamanı iştirakçıların suallarını cavablandıracaq.

Bu il forumda 100-dən çox dövlətdən təxminən 20 min nümayəndənin iştirak edəcəyi gözlənilir. Forum iştirakçıları arasında Özbəkistan və Tanzaniya prezidentləri, Çin Xalq Respublikasının sədr müavini Han Çjen, həmçinin son bir neçə ildə ilk dəfə olaraq forumda iştirak edəcək ABŞ-nin rəsmi nümayəndə heyəti də olacaq.

Forum çərçivəsində Vladimir Putin və Özbəkistan Prezidenti Şavkat Mirziyoyev videokonfrans formatında Özbəkistanda inteqrasiya olunmuş atom elektrik stansiyasının ilk enerji blokunun tikintisinə start verəcəklər.

Sankt-Peterburq Beynəlxalq İqtisadi Forumu Rusiyada ilin ən mühüm işgüzar və iqtisadi tədbiri hesab olunur. Forum 1997-ci ildən etibarən ənənəvi olaraq Sankt-Peterburqda keçirilir. Müqavilələrin bağlandığı və əsas qlobal iqtisadi trendlərin müzakirə olunduğu bu forumu tez-tez “Rusiya Davosu” da adlandırırlar.