Kaliforniya Universitetinin Riversayd kampusundan olan alimlərin apardığı yeni araşdırma göstərib ki, gündəlik qidalanma xoleranın, müalicə olunmadıqda ağır ishala və hətta ölümə səbəb ola bilən təhlükəli bakterial infeksiyanın gedişinə ciddi təsir göstərə bilər.

ERAmedia xəbər verir ki, tədqiqatın nəticələri “Cell Host and Microbe” jurnalında dərc olunub.

Araşdırma zamanı məlum olub ki, zülalla zəngin pəhriz xolera vibrionunun bağırsaqda möhkəmlənmə qabiliyyətini kəskin şəkildə azaldır. Xüsusilə iki zülal mənbəyi süd və pendirin əsas zülalı olan kazein, eləcə də buğda qlüteni ən güclü təsiri göstərib. Siçanlar üzərində aparılan təcrübələrdə bağırsaqdakı bakteriyaların miqdarı rasionun tərkibindən asılı olaraq yüz dəfəyədək fərqlənib.

Alimlər bir neçə qidalanma növünü müqayisə ediblər. Bu sıraya yağlarla zəngin pəhriz, sadə karbohidratların üstünlük təşkil etdiyi rasion və zülallarla zəngin qidalanma daxil edilib. Yüksək yağlı pəhriz infeksiyaya demək olar ki, təsir etməyib, karbohidratlar məhdud effekt göstərib, lakin zülallarla zəngin qidalanma, xüsusilə kazein və qlütenlə yoluxmanı demək olar ki, tam bloklayıb.

Daha ətraflı analiz göstərib ki, zülallar bakteriyanın səthində yerləşən xüsusi bir mexanizmin — altıncı sekresiya sisteminin fəaliyyətini zəiflədir. Bu sistem mikroskopik “şpris” rolunu oynayaraq xolera vibrionuna qonşu hüceyrələrə toksinlər yeritməyə və rəqib bakteriyaları məhv etməyə imkan verir. Bu mexanizm zəiflədikdə, xolera bağırsaq mühitini effektiv şəkildə ələ keçirmək qabiliyyətini itirir.

Xolera hələ də təmiz suya çıxışın məhdud olduğu Asiya və Afrika ölkələri üçün ciddi təhlükə olaraq qalır. Əsas müalicə üsulu orqanizmdə maye itkisini bərpa etməkdir, antibiotiklər isə yalnız xəstəliyin müddətini qısaldır və toksinlərin təsirini tam aradan qaldırmır. Bundan əlavə, antibiotiklərin həddindən artıq istifadəsi bakteriyalarda davamlılığın yaranması riskini artırır.

Tədqiqatın müəllifləri vurğulayırlar ki, qidalanma strategiyaları dərmanlara davamlılıq yaratmır və infeksiyanın ağır gedişi riskini azaltmaq üçün ucuz və təhlükəsiz üsul ola bilər. Araşdırma heyvanlar üzərində aparılsa da, alimlər insanlarda da oxşar təsirin olacağını gözləyir və insan mikrobiotası ilə bağlı əlavə tədqiqatlar planlaşdırırlar.

Gələcəkdə qidalanmanın yaxşılaşdırılması, xüsusilə həssas regionlarda, infeksion xəstəliklərə qarşı klassik qoruyucu tədbirlərə mühüm əlavə ola bilər.