Azərbaycanın tanınmış aktyoru, Xalq artisti Əliağa Ağayev ilə bağlı maraqlı və ibrətamiz bir hadisə illər sonra da xatırlanır. Hadisə onun gündəlik trolleybusdan istifadə etdiyi vaxt baş verib.

ERAmedia xəbər verir ki, şahidlərin və ailə üzvlərinin xatirələrinə görə, aktyor həmin gün trolleybusda gənc bir oğlanın kədərli vəziyyətini görür. Söhbət zamanı məlum olur ki, ailədə böyük ümidlərlə gözlənilən həmin gənc ali məktəbə qəbul imtahanında bir bal fərqlə uğur qazana bilməyib. Bu isə ailə üçün ciddi məyusluq yaradıb.

Əliağa Ağayev əvvəlcə gəncin əhvalını yüngülləşdirmək üçün zarafat edir, daha sonra isə vəziyyəti daha ciddi şəkildə öyrənir. O, gəncin ailə vəziyyətini və təhsil arzularını nəzərə alaraq məsələyə biganə qalmır.

Aktyor gənclə birlikdə birbaşa ali təhsil müəssisəsinə gedir və qəbul komissiyası ilə görüşür. O, gəncin vəziyyətini izah edərək onun oxumaq istəyinin nəzərə alınmasını xahiş edir.

Görüşdən sonra məsələ müsbət həll olunur və gəncin təhsil almasına şərait yaradılır. Bu hadisə həm tələbə, həm də onun ailəsi üçün böyük dönüş nöqtəsi olur.

Lakin ən diqqətçəkən məqam sonradan yaşanır. Xalq artistinin oğlu xatırlayır ki, bir müddət sonra həmin gənc rayondan onlara təşəkkür məqsədilə hədiyyə göndərmək istəyib. Lakin Əliağa Ağayev bunu qəbul etməyib və ailəyə izah edib ki, edilən yaxşılıq qarşılıq gözləmək üçün deyil.

Bu hadisə Əliağa Ağayevin təkcə sənətkar deyil, həm də insanlara kömək etməyi həyat prinsipi kimi qəbul edən bir şəxs olduğunu göstərən nümunələrdən biri kimi yadda qalıb.

Əli Fərhad