Müasir Azərbaycan rəssamlığında fərqli üslubu ilə seçilən Elmira Kərimova yaradıcılığında nitkoqrafiya sənətinə xüsusi yer ayırır. Sapların ritmi və rənglərin harmoniyasını bir araya gətirən sənətkar əsərləri ilə tamaşaçıya fərqli vizual dünyalar təqdim edir. O, ERAmedia-nın əməkdaşı ilə söhbətində nitkoqrafiyanın incəliklərindən, bu sahəyə gəlməsinin səbəblərindən və yaradıcılıq fəlsəfəsindən danışıb.

Rəssam, eyni zamanda, müasir təsviri sənətdə yenilikçi yanaşmaların əhəmiyyətini və gənc sənətkarlar üçün yaradılmalı imkanları da diqqətə çatdırıb.

Müsahibədə Elmira Kərimova gələcək layihələri, sənətə baxışı və nitkoqrafiyanı rəngkarlıqla birləşdirmək planları barədə də fikirlərini bölüşür. Fərqli yaradıcılıq axtarışları ilə seçilən rəssamın sənət dünyasına baxışı oxucular üçün maraqlı məqamlarla zəngindir.

Qeyd edək ki, Elmira Kərimova Qubadlı şəhərində anadan olub. Qara İlyasov adını Qubadlı şəhər 1 saylı orta məktəbini bitirib. Azərbaycan Dövlət Pedoqoji Universitetində ali təhsil alıb.

ERAmedia istedadlı rəssam Elmira Kərimova ilə müsahibəni təqdim edir:

-Yaradıcılığında fərqli janra üstünlük verirsiniz. Öncə bu janrın özünəməxsusluğu və çətinliyi barədə danışardınız. Bu fərqli janra yönəlməyiniz necə başladı, ilk ilham mənbəyiniz nə oldu?

– Yaradıcılığımda həm nitkoqrafiya, həm də kətan üzərində yağlı və akril boya ilə işləyirəm. Qeyd edim ki, nitkoqrafiya (ingiliscə String Art və ya Thread Art) saplardan istifadə etməklə hazırlanan dekorativ təsviri sənət növüdür. Bu texnikada müxtəlif rəngli saplar müəyyən sxem üzrə taxta, karton və ya başqa səth üzərində yerləşdirilmiş mismarlara, sancaq və ya digər dayaqlara keçirilərək müxtəlif kompozisiyalar yaradılır.

Nitkoqrafiya mənim üçün fərqli və xüsusi bir ifadə formasıdır, çünki burada sapların ritmi və toxuması ilə obraz yaranır. Kətan üzərində işləmək isə rənglərin sərbəstliyi və dərinliyi ilə duyğularımı daha geniş ifadə etməyə imkan verir. Bu sahəyə marağım uşaqlıqdan rəsmə olan sevgimlə başlayıb. İlk ilham mənbəyim təbiət, insan emosiyaları və həyatın özü olub.

Yaradıcılıq prosesində hər bir əsərə fərdi yanaşmağa və özünəməxsus kompozisiya qurmağa çalışıram. Fərqli material və texnikaları bir araya gətirmək mənim üçün yeni bədii imkanlar yaradır. Hər bir işimdə tamaşaçı ilə emosional və mənəvi bağ qurmağı əsas məqsədlərimdən biri hesab edirəm. Davamlı axtarış və təcrübələr sayəsində üslubumu inkişaf etdirməyə və yeni ifadə vasitələri kəşf etməyə çalışıram. İnanıram ki, sənət insanın daxili dünyasını ifadə etməyin ən təsirli yollarından biridir.

– Azərbaycan rəssamlıq mühitində tamamilə fərqli üslubla çıxış etmək sizə hansı çətinlikləri və üstünlükləri qazandırıb?

– Fərqli texnikalarla işləmək mənə həm özümü daha geniş ifadə etmək, həm də fərqli auditoriyalara çatmaq imkanı verib. Əlbəttə, yenilik hər zaman ilk mərhələdə çətin qəbul olunur. Amma bu fərqlilik mənim yaradıcılıq imzamı formalaşdırdı və məni digərlərindən ayırdı.

Hər yeni layihə mənim üçün həm öyrənmək, həm də öz sərhədlərimi genişləndirmək fürsətidir. İzləyicilərin əsərlərimə fərqli baxış bucaqları ilə yanaşması yaradıcılığıma yeni düşüncələr qazandırır. Vaxt keçdikcə qazandığım təcrübə seçimlərimdə daha cəsarətli olmağıma kömək edib. Sənətdə səmimiyyətə və orijinallığa sadiq qalmağı hər zaman əsas prinsip hesab edirəm. Gələcəkdə də yeni ideyaları müxtəlif bədii vasitələrlə həyata keçirməyi və yaradıcılıq yolumu davam etdirməyi qarşıma məqsəd qoymuşam.

– Əsərlərinizdə tamaşaçının ilk olaraq nə hiss etməsini və ya nəyi düşünməsini istəyirsiniz?

– İstəyirəm ki, tamaşaçı əsərlərə baxanda ilk növbədə səmimiyyət və enerji hiss etsin. Hər bir işimdə duyğu, düşüncə və həyatın bir parçasını ötürməyə çalışıram. Mənim üçün sənət insanın iç dünyasına toxunmaqdır.

Əsərlərimin hər biri fərqli bir hekayənin vizual ifadəsidir. Tamaşaçının əsərlə özünəməxsus əlaqə qurması və onu fərqli şəkildə dəyərləndirməsi mənim üçün böyük əhəmiyyət daşıyır. Yaradıcılığın insanları düşündürən və ilhamlandıran bir gücə sahib olduğuna inanıram. Bu səbəbdən gələcək fəaliyyətimdə də yeni mövzular və fərqli yanaşmalar üzərində çalışmağı planlaşdırıram.

– Nitkoqrafiya janrından kənarda sizi təsirləndirən və maraq göstərdiyiniz başqa rəssamlıq üslubları varmı?

– Bəli, xüsusilə realizm, abstrakt sənət və ekspressionizm mənə çox maraqlıdır. Realizm ətraf aləmi və insanı olduğu kimi təsvir etməyi, detallara diqqət yetirməyi öyrədir və müşahidə qabiliyyətimi inkişaf etdirir. Abstrakt sənət isə forma və rəng vasitəsilə düşüncə və hissləri sərbəst şəkildə ifadə etməyə imkan yaradır, yaradıcılıq sərhədlərimi genişləndirir. Ekspressionizm isə daxili emosiyaları, həyəcanı və fərdi baxışı güclü bədii dillə çatdırmaq baxımından mənə xüsusi təsir edir. Bu üslubların hər biri fərqli texniki bacarıqlar qazandırmaqla yanaşı, sənətə müxtəlif prizmadan yanaşmağı öyrədir. Yaradıcılığımda bu istiqamətlərdən ilham alaraq özünəməxsus üslub formalaşdırmağa və hər əsərdə yeni ifadə vasitələri axtarmağa çalışıram.

– Sizin fikrinizcə, müasir Azərbaycan rəssamlığında yeni və fərqli baxışların inkişafı üçün hansı imkanlar daha vacibdir?

– Məncə, gənc rəssamların özlərini sərbəst ifadə edə biləcəyi platformalar, sərgilər və beynəlxalq layihələr çox vacibdir. Yeni texnikaların tanınması və sənətə açıq yanaşma inkişaf üçün əsasdır.

Bundan əlavə, peşəkar mentorluq proqramları və ustad dərsləri gənc rəssamların inkişafına mühüm töhfə verə bilər. Yaradıcılıq mühitində təcrübə mübadiləsi aparmaq və digər sənətkarlarla əməkdaşlıq etmək yeni ideyaların yaranmasına şərait yaradır. Müasir texnologiyalardan və rəqəmsal platformalardan səmərəli istifadə etmək əsərlərin daha geniş auditoriyaya təqdim olunmasına imkan verir. İnanıram ki, yaradıcı insanlara göstərilən dəstək və diqqət ölkədə təsviri sənətin gələcək inkişafına müsbət təsir göstərəcək.

– Gələcək yaradıcılıq planlarınızda tamaşaçını yenidən təəccübləndirəcək hansı ideyalar və ya layihələr var?

– Gələcəkdə nitkoqrafiya ilə rəngkarlığı birləşdirən yeni layihələr üzərində işləmək istəyirəm. Sapın teksturası ilə boyanın rəng enerjisini bir araya gətirib fərqli və yeni vizual dil yaratmaq əsas planlarımdandır. Bu, tamaşaçıya həm texniki, həm də emosional baxımdan yeni təcrübə təqdim edəcək.

Eyni zamanda, bu layihələrin beynəlxalq sərgilərdə nümayiş olunmasını və daha geniş auditoriyaya təqdim edilməsini arzulayıram. Yaradıcılıq axtarışlarımda eksperimentlərə açıq qalaraq fərqli material və yanaşmaları sınamağa davam edəcəyəm. Məqsədim öz sənət yolumu ardıcıl şəkildə inkişaf etdirərək müasir təsviri sənətə fərqli töhfə verməkdir.

Rəsul Mirhəşimli