ABŞ prezidenti Donald Tramp İrana hakimiyyətin hədəfə alınmasından əvvəl sülh sazişi imzalaması üçün “son şans” qaldığını bildirib.

ERAmedia xəbər verir ki, ABŞ lideri bu təhdidi “başlarını qoparmamışdan əvvəl son şanslarıdır” ifadəsi ilə səsləndirib.

Tramp Ağ Evdə çıxışı zamanı İran Xarici İşlər Nazirliyinin daha əvvəl danışıqlar aparıldığına dair məlumatı təkzib etməsinə baxmayaraq, Vaşinqtonla Tehran arasında yeni danışıqların başladığını iddia edib.

O, Oval kabinetdə jurnalistlərə bildirib ki, ABŞ və İran İranın müraciəti əsasında danışıqlar aparır. Trampın sözlərinə görə, bu təşəbbüs Səudiyyə Ərəbistanı, Birləşmiş Ərəb Əmirlikləri və xüsusilə Qətər tərəfindən dəstəklənir.

ABŞ prezidenti qeyd edib ki, danışıqların əsas mövzuları Hörmüz boğazının yenidən açılması və İranın nüvə proqramının məhdudlaşdırılmasıdır. Vaşinqton uzun müddətdir ki, razılaşma üçün məhz bu iki şərti irəli sürür.

Tramp bildirib ki, birinci mərhələdə Hörmüz boğazının tam şəkildə açılması, ikinci mərhələdə isə İranın nüvə imkanlarının məhdudlaşdırılması müzakirə olunur.

Son aylarda Hörmüz boğazı tərəflər arasında aparılan diplomatik təşəbbüslərin əsas mübahisə mövzularından birinə çevrilib.

Tehran ABŞ və İsrailin fevral ayının sonunda İrana endirdiyi zərbələrdən sonra dünya üzrə dəniz yolu ilə neft ticarətinin təxminən dörddəbirinin həyata keçirildiyi Hörmüz boğazını faktiki olaraq bağlamışdı. Bu isə enerji bazarlarında ciddi gərginlik yaratmışdı.

ABŞ və İran iyun ayında münaqişəni dayandırmaq və boğazı yenidən açmaq məqsədilə müvəqqəti razılaşmanı nəzərdə tutan memorandum imzalasalar da, qısa müddət sonra qarşılıqlı hücumlar yenidən başlamışdı.

Tramp “razılaşmanın əsas prinsipləri” üzrə anlaşma əldə olunduğuna görə İran və bəzi Yaxın Şərq ölkələrinin müraciəti əsasında İrana qarşı genişmiqyaslı hərbi əməliyyat planını ləğv etdiyini açıqlamışdı.

Bununla yanaşı, İran ordusu Trampın Tehranın ABŞ-dən hücumları dayandırmağı xahiş etdiyi barədə iddiasını təkzib edib. Ordunun bəyanatında bu iddia “Fars körfəzi ölkələrinin rəhbərlərinə təzyiq göstərmək məqsədilə ortaya atılmış növbəti yalan” kimi qiymətləndirilib.

İran Xarici İşlər Nazirliyinin sözçüsü İsmayıl Bəqayi isə bildirib ki, ABŞ ilə hər hansı bir danışıqlar aparılmır. Onun sözlərinə görə, yalnız Hörmüz boğazından gəmilərin təhlükəsiz keçidinin təmin edilməsi məsələsi ilə bağlı Oman vasitəsilə məsləhətləşmələr davam edir.