İqlim dəyişikliyi inflyasiyanı gücləndirə bilən amillərdən biridir. İsti və ya soyuq dalğalar kimi ekstremal hava hadisələri və qasırğa və ya daşqın kimi təbii fəlakətlər xüsusilə kənd təsərrüfatında istehsal gücünü azaldır və nəqliyyat infrastrukturunu pozur. İqlim dəyişikliyinin inflyasiyaya təsiri son illərdə o qədər qabarıq şəkildə özünü büruzə verir ki, ona xüsusi bir ad qoyulub artıq: “iqlimflyasiya” (“iqlim” və “inflyasiya” sözlərindən).

İqtisadçı alimlərin hesablamalarına görə, “iqlimflyasiya” növbəti onillikdə, yəni 2035-ci ilə qədər ərzaq inflyasiyasını 0,9-3 faiz bəndi sürətləndirə bilər. Qlobal miqyasda orta illik inflyasiya 0,3-1,2 faiz bənd, ümumi inflyasiya isə illik 12,3 faiz bənd sürətlənə bilər.

Hər hansı bir ölkədə temperatur anomaliyalarının nəticələri onun sərhədləri daxilində artıq məhdudlaşmır, əmtəə bazarları vasitəsilə beynəlxalq bazarlara ötürülür.

Əgər əmtəə ixrac edən ölkələrdə temperatur şokları baş verərsə, bunun nəticələri qlobal xarakter daşıyır, çünki digər iqtisadiyyatlar daha yüksək inflyasiya “idxal edir” və bu qiymət təzyiqi daxili qiymətlərə ötürülür.