İran ABŞ-a bildirib ki, sanksiyaların ləğvi və uranın zənginləşdirilməsi hüququnun tanınması müqabilində nüvə proqramı üzrə yeni güzəştlərə getməyə hazırdır.

ERAmedia xəbər verir ki, bu barədə “Reuters” agentliyi məlumat yayıb. Məlumata görə, Tehran bununla Vaşinqtonun mümkün hərbi hücumunun qarşısını almağı hədəfləyir.

İki raund danışıqlardan sonra tərəflər, xüsusilə də sərt ABŞ sanksiyalarının zəiflədilməsinin miqyası və ardıcıllığı məsələsində hələ də fikir ayrılıqları yaşayır. Lakin agentlik qeyd edir ki, ötən həftə başa çatan danışıqlardan sonra İranın yeni güzəştlər təklif etməsi ilk dəfə qeydə alınıb. Həmin vaxt tərəflər arasında mövqelər kəskin fərqlənirdi və hərbi qarşıdurma ehtimalı artmışdı.

Analitiklərin fikrincə, bu addım Tehranın diplomatik münasibətləri qorumaq və ABŞ-ın böyükmiqyaslı zərbəsinin qarşısını almaq cəhdidir.

Rəsmi şəxsin sözlərinə görə, Tehran yüksək səviyyədə zənginləşdirilmiş uranın yarısının xaricə göndərilməsi, qalan hissəsinin isə seyrəldilməsi variantını ciddi şəkildə nəzərdən keçirəcək.

Bundan əlavə, İran regional uran zənginləşdirmə konsorsiumunun yaradılmasında iştirak etməyə hazırdır. Bu ideya daha əvvəl də diplomatik müzakirələrdə gündəmə gətirilmişdi.

Rəsmi əlavə edib ki, Tehran bu addımları ABŞ-ın İranın “dinc məqsədli uran zənginləşdirmə” hüququnu tanıması və iqtisadi sanksiyaların ləğvi daxil olan razılaşma qarşılığında atacaq.

Həmçinin İran uzunmüddətli nüvə mübahisəsinin həlli üzrə danışıqlar çərçivəsində ABŞ şirkətlərinə ölkənin iri neft-qaz sektorunda podratçı qismində iştirak imkanı təklif edib.

“İqtisadi paket çərçivəsində ABŞ-a İranın neft sənayesində ciddi investisiya və real iqtisadi maraqlar əldə etmək imkanları da təqdim olunub”, – deyə rəsmi bildirib.

O, son danışıqların tərəflər arasındakı fikir ayrılıqlarını bir daha göstərdiyini qeyd edib və əlavə edib ki, “aralıq razılaşma əldə olunması ehtimalı mövcuddur”, çünki müzakirələr davam edir.

“Son raund göstərdi ki, sanksiyaların ləğv olunmasının miqyası və mexanizmi ilə bağlı ABŞ-ın baxışı İranın tələblərindən fərqlənir. Hər iki tərəf sanksiyaların mərhələli şəkildə aradan qaldırılması üzrə məntiqli qrafik razılaşdırmalıdır. Bu fəaliyyət planı qarşılıqlı maraqlara əsaslanmalıdır”, – deyə rəsmi vurğulayıb.

İranın xarici işlər naziri Abbas Əraqçinin bazar günü açıqlamasına görə, o, cümə axşamı Cenevrədə Trampın xüsusi nümayəndəsi Stiv Uitkoffla görüş gözləyir. Nazir əlavə edib ki, diplomatik həll üçün hələ də “yaxşı şans” mövcuddur.