Bu gün ilin ən həyəcanlı günlərindən biridir. Təqvimdə görünən 31 avqust insanın içində tamam başqa cür hiss olunur.

Sabah bizi sentyabrın 1-i gözləyir.

Sakitlik bitir. Məzuniyyətlər başa çatır, istirahət günləri arxada qalır. Yayın uzun və yavaş ritmi dəyişir. Küçələr yenidən adamla dolacaq, səhərlər tez açılacaq, telefonlar daha çox zəng çalacaq, görüşlər çoxalacaq, avtobus, metro boş olmayacaq.

Sentyabr gəlir. Bu gəlişlə həyat öz sürətini geri qaytarır. Əslində sentyabrın qəribə bir xüsusiyyəti var. Hamımızın düşüncəsində yanvar yeni ilin başlanğıcıdır, sentyabr insanlara daha çox “yeni başlanğıc” hissi verir.

Sentyabrda yayda təxirə salınan işlər masaya qayıdır. “Sentyabrda edərəm” dediyimiz nə varsa, sabahdan bizi gözləyir.

Fərqinə varmırıq, amma buna görə 31 avqust bir az qəribə gündür. İnsan bir tərəfdən yayın bitməsinə heyfsilənir, digər tərəfdən qarşıdakı günlərin gətirəcəyi yenilikləri səbirsizliklə gözləyir.

Avqustda dəniz, günəş, istirahət, gec oyanmaq vardı. Sentyabrda zəngli saat, iş, məktəb, universitet, görüşlər, məsuliyyətlər və yeni planlar dayanır.

Həyatın ən maraqlı tərəfi də elə budur, insan sakitliyi sevir, amma hərəkətsiz də yaşaya bilmir.

Sabah bunun ən gözəl sübutudur.

Sentyabr tək iş həyatını canlandırmayacaq. Siyasi payız da başlayır. Yay aylarında bir qədər səssiz görünən siyasi gündəm yenidən sürətlənəcək. Yay boyu yığılan suallar cavab gözləyir. Cəmiyyətin gözləntiləri var. Yeni qərarlar, yeni müzakirələr, yeni açıqlamalar qarşıdadır.

Azərbaycan Prezidenti Qırğızıstanda rəsmi görüşlərdə olacaq. Bu da sentyabrın ilk günlərindən Azərbaycanın siyasi və diplomatik gündəminin kifayət qədər hərəkətlə başlayacağından xəbər verir.

Milli Məclis öz işinə başlayacaq. Yay fasiləsindən sonra parlament gündəmi, qanunvericilik məsələləri, deputatların açıqlamaları və cəmiyyəti maraqlandıran mövzular yenidən diqqət mərkəzinə gələcək.

İşğaldan azad edilmiş yurd yerlərimizə növbəti köç karvanları gedəcək. Bir vaxtlar həsrətlə gözlədiyimiz qayıdış prosesi davam edəcək. Doğma torpaqlara qayıdan hər bir ailə Azərbaycanın yeni tarixinin daha bir səhifəsini yazacaq.

Texnoloji inkişafımız var. Dünya dəyişir, biz də dəyişirik. Yeni texnologiyalar, rəqəmsallaşma və müasir imkanlar həyatımızın daha böyük hissəsinə çevrilir. Sentyabr həm də bu istiqamətdə yeni fikirlərin, yeni layihələrin və yeni imkanların müzakirə olunacağı bir dövr olacaq.

İşlə, təhsillə, ailə ilə, gələcəklə, ölkənin qarşıdakı günləri ilə bağlı hamının öz sualı var. Ona görə də sentyabr hər kəs üçün eyni sentyabr deyil.

Sentyabrın ən böyük sirri odur ki, hamıya eyni tarix gəlir, amma hər kəs həmin tarixdən fərqli bir həyat gözləyir.

Sabah saatlar yenidən tez oyanmağa qurulacaq. Daha çox insan tələsəcək. Yollar daha çox canlanacaq. Yay boyu boş qalan bəzi masaların arxasında yenidən insanlar oturacaq.

Anlayacağıq ki, həyat dayanmayıb, bir müddət nəfəs alıb. İndi yenidən başlayır. 31 avqustun həyəcanı elə buradan gəlir.

Bu gün hamımız keçmiş yayla gələcək sentyabrın arasında dayanmışıq. Bir ayağımız istirahətdə, o biri ayağımız işdədir. Bir tərəfdə xatirələr, o biri tərəfdə gözləntilər baxır.

Sabahla bizi cəmi bir neçə saat ayırır.

Avqust gedir, sentyabr gəlir. Sakitlik bitir, həyat sürətini artırır.