Azərbaycan Respublikası Baş nazirinin müavini Şahin Mustafayev, Rusiya Federasiyasının Baş nazirinin müavini Aleksey Overçuk və İranın yol və şəhərsalma naziri Fərzanə Sadiqinin rəhbərlik etdikləri nümayəndə heyətləri Astaraya səfər edərək Şimal-Cənub Beynəlxalq Nəqliyyat Dəhlizinin vacib infrastruktur layihələrinə baxış keçiriblər.

ERAmedia xəbər verir ki, səfər zamanı Astaraçay üzərində salınan avtomobil və dəmir yolu, eləcə də gömrük-keçid məntəqəsi barədə ətraflı məlumat verilib.

Qeyd olunub ki, 2023-cü ilin dekabrında Azərbaycan-İran sərhədində Astaraçay üzərində beynəlxalq standartlara cavab verən yeni avtomobil körpüsü və sərhəd-keçid məntəqəsi yenidən qurularaq istismara verilib. Körpünün buraxılış imkanı hər tərəfə gündə 500 ədəd giriş və 500 ədəd çıxış olmaqla, ümumilikdə 1000 ədəd yük nəqliyyat vasitəsi təşkil edir.

Azərbaycan və İran arasında Astaraçay üzərində yeni körpünün təməli 25 yanvar 2022-ci ildə qoyulub. Körpü 3 aşırımlı olmaqla uzunluğu 97,5 metr, eni isə 30,5 metrdir. 4 hərəkət zolaqlı körpüdə əlavə olaraq ehtiyat hərəkət üçün daha 2 zolaq, həmçinin hər birinin eni 2,5 metr olan 2 piyada keçidi tikilib. Körpü yük avtomobillərinin daha əlverişli şəraitdə hərəkətinə geniş imkan yaradıb. Yeni körpü və müasir tələblərə cavab verən gömrük-keçid məntəqəsi avtomobillərin uzun müddət gözləməsinin qarşısını alır və yükdaşımanı asanlaşdıraraq sürücülərin rahatlığını təmin edir.

Daha sonra “Azərbaycan Dəmir yolları” QSC-nin İranın Astara şəhərində inşa etdiyi Cənub Yük Terminalının tikinti işlərinin gedişi ilə tanışlıq olub. Qeyd olunub ki, texniki işlərin 94, tikinti işlərinin isə 81 faizi başa çatdırılıb. Terminalda 5000 kvadratmetr qapalı və açıq anbarlar, taxıl, meyvə terminalları və 19 min 773 kvadratmetr konteyner platforması tikilib. Terminalın hazırkı illik yükaşırma imkanı 1 milyon ton təşkil edir və onun 5 milyon tona qədər artırılması nəzərdə tutulur. Tikinti işlərinin 2025-ci ilin sonuna qədər başa çatdırılması planlaşdırılır. Ötən il Cənub Yük Terminalından 800 min ton yük aşırılıb.

Nümayəndə heyətləri, həmçinin İran ərazisində Rəşt-Astara dəmir yolunun tikintisinə baxış keçiriblər.