Sentyabr səyahət həvəskarları üçün yeni imkanlar açır. Mülayim hava, daha az turist sıxlığı və təbiətin rənglərini dəyişməyə başladığı bu ay yay mövsümünün ən gur vaxtından kənarda dincəlmək və yeni yerlər kəşf etmək üçün əlverişli şərait yaradır.

ERAmedia xəbər verir ki, payız səyahətlərinə artan maraq “Super Sentyabr” trendində də öz əksini tapır və bu mövsüm Türkiyənin göllərini, onların sakit və füsunkar ətrafını kəşf etmək üçün ideal vaxt hesab olunur. Artıq səyyahlar yalnız bir məkanı ziyarət etməklə kifayətlənmir, səfərdən özləri ilə qeyri-adi təcrübələr və yadda qalan hekayələr aparmağa çalışırlar. Təbiət isə bu axtarışın əsas istiqamətlərindən biridir. Millennial və Z nəsillərinə mənsub səyahətçilərin yarıdan çoxu öz “hekayə ovçuluğu” səyahətlərinin bir hissəsi kimi vəhşi təbiət və təbiətlə bağlı təcrübələrə maraq göstərir.

Müxtəlifliyi ilə seçilən coğrafiyası Türkiyədə yaşanmağı gözləyən saysız-hesabsız hekayələr üçün ideal məkanlar yaradır. Kristal kimi şəffaf suların kənarında sakit anlardan tutmuş, dağlar, meşələr və payızın valehedici mənzərələri ilə əhatələnmiş açıq hava macəralarınadək ölkənin gölləri təbiətin ən yaddaqalan tərəflərini yaşamaq imkanı verir. Növbəti “hekayə ovçuluğu” səyahətiniz üçün Türkiyənin mütləq görməli olduğunuz göllərindən bəziləri bunlardır.

Sapanca gölü: İstanbulun lap yaxınlığında

İstanbuldan qısa məsafədə yerləşən Sapanca gölü, Sakaryanın Sapanca rayonunun sıx yaşıllıqlarla örtülü təpələri arasında yerləşərək valehedici firuzəyi suları ilə həftəsonu istirahəti üçün ideal məkanlardan biridir. Burada sahil boyunca gəzintiyə çıxmaq, velosiped sürmək, quşları müşahidə etmək və ya sadəcə ağacların kölgəsində göl mənzərəsindən zövq alaraq dincəlmək mümkündür. Qısa kayak turu ilə gölün sularına çıxmaq da səfərə fərqli rəng qata bilər. Ətraf ərazidə müxtəlif ehtiyac və seçimlərə uyğun yerləşmə imkanları mövcuddur, yerli restoranlarda isə göldən təzə tutulmuş balıqlardan hazırlanan yeməklər təqdim olunur. Daha çox macəra axtaranlar gölün yüksək ərazilərində yerləşən Arifiye meşəsində düşərgə və piknik etməyi də seçə bilərlər.

Yaxınlıqdakı görməli yerlər: Cəmi yarım saatlıq məsafədə yerləşən Kartepe dağından açılan möhtəşəm mənzərələrdən zövq alın və təbiətlə əhatə olunmuş Maşukiyeni də səyahət marşrutunuza əlavə edin.

Qara dənizin inciləri: Abant və Yedigöllər

Abant gölü Boluda, İstanbuldan təxminən üç saatlıq məsafədə yerləşir və ilin hər fəslində fərqli mənzərəsi ilə təbiətin qoynunda istirahət üçün ideal imkan yaradır. Gölün valehedici mənzərələri sizi unudulmaz kadrlar çəkməyə və ya gördüklərinizi dəftərinizdə rəsmə köçürməyə həvəsləndirə bilər. Eyniadlı milli parkın ərazisində qorunan göl müxtəlif istirahət imkanları ilə də seçilir. Mövsümdən asılı olaraq sahil boyunca velosiped sürmək, alabalıq tutmaq, eləcə də yürüş, düşərgə, piknik, at sürmək və yamac paraşütü ilə uçuş kimi fəaliyyətlərdən yararlanmaq mümkündür. Beşulduzlu hotellərdən rahat bungalovlara, düşərgə və karvan dayanacaqlarına qədər müxtəlif yerləşmə seçimlərinin, həmçinin yerli restoranların olması Abant gölünü daha cəlbedici istirahət məkanına çevirir.

Təbiət həvəskarları üçün Boluda daha bir mütləq dayanacaq Yedigöllərdir. Adını park ərazisində yerləşən sürüşmə nəticəsində yaranmış yeddi göldən alan Yedigöllər müxtəlif relyef formaları, şəlalələri, zəngin flora və faunası ilə Türkiyənin təbii möcüzələrindən biri hesab olunur. Göllərin yaratdığı heyranedici mənzərələrlə yanaşı, ölkənin ən zəngin qarışıq təbii meşələrindən birinə ev sahibliyi edən milli parkda düşərgə, piknik və yürüş daha fərqli təcrübəyə çevrilir. Təbiətin qoynunda daha uzun müddət qalmaq və bu atmosferi tam yaşamaq istəyənlər göllərin ətrafında yerləşən rahat bungalovlardan birində qala bilərlər.

Yaxınlıqdakı görməli yerlər: Boluda olarkən “Cittaslow” – “Sakit şəhər” statusuna malik Mudurnu və Göynük şəhərlərini ziyarət edə, bu tarixi yaşayış məntəqələrində qorunub saxlanılan ənənəvi türk evləri ilə tanış ola bilərsiniz.

Aralıq dənizi gölləri bölgəsi və Salda gölü

Türkiyənin cənubunda, Aralıq dənizi hövzəsində yerləşən Göllər bölgəsi bir-birinə yaxın ərazidə yerləşən çoxsaylı göllərin yaratdığı zəngin ekosistemi ilə seçilən unikal coğrafiyadır. Afyonkarahisar, Antalya, Burdur, Isparta və Konya vilayətlərinin bir hissəsini əhatə edən bölgədə Acıgöl, Akşehir, Akgöl, Burdur, Beyşehir, Gavur, Işıklı, Ilgın, Eğirdir, Eber, Kovada, Salda, Karamık, Suğla, Yarışlı və Karataş gölləri də daxil olmaqla çoxsaylı tektonik mənşəli göllər yerləşir. Lakin bölgənin ən böyük təbii sərvətlərindən biri kristal kimi şəffaf suları və incə, ağ qumları ilə məşhur olan Salda gölüdür. Burdurda yerləşən Salda gölü möhtəşəm mənzərələri, Marsın səthini xatırladan geoloji xüsusiyyətləri və zəngin su idmanı imkanları ilə ziyarətçilərə unudulmaz təcrübələr vəd edir. Burada yürüş və fotoqrafiya ilə yanaşı, sakit sularda kayak sürməkdən tutmuş, mineral tərkibli suların dəri üçün faydalı olduğuna inanılan sahillərdə sərinləyici üzməyə qədər müxtəlif fəaliyyətlər mümkündür. Təcrübə yalnız göl sahili ilə məhdudlaşmır: yaxınlıqdakı düşərgə əraziləri, bungalovlar və qonaq evləri müxtəlif büdcələrə uyğun yerləşmə imkanları təqdim edir, göl kənarındakı restoran və kafelərdə isə təbiətin qoynunda yerli təamların və sərinləşdirici içkilərin dadına baxmaq olar.

Yaxınlıqdakı görməli yerlər: Burdurun Akçaköy kəndində uzanan sonsuz lavanda tarlalarını kəşf etməyi, eləcə də bu günədək bərpa olunmuş monumental fəvvarələrindən su axan Sagalassos və Kibyra qədim şəhərlərini ziyarət etməyi unutmayın.

Mərkəzi Anadolunun təbii incisi: Duz gölü

Mərkəzi Anadoluda Ankara, Aksaray və Konya vilayətlərinin kəsişməsində yerləşən Duz gölü Türkiyənin ikinci ən böyük gölüdür. Yüksək duzluluğuna görə hipersalin göl hesab olunan Duz gölü Türkiyənin ən qeyri-adi təbiət mənzərələrindən birini təqdim edir. Yay aylarında göl suyunun buxarlanması nəticəsində səthdə diqqətçəkən duz təbəqəsi yaranır. Buna yosunların yaratdığı rənglər də əlavə olunduqda, xüsusilə gün batımı zamanı gölün çəhrayı mənzərəsi valehedici görüntü yaradır. Göl həmçinin köçəri vəhşi təbiət üçün mühüm yaşayış məkanıdır. Hər il minlərlə flaminqonun yuva saldığı Duz gölü Türkiyənin ən əhəmiyyətli flaminqo çoxalma ərazilərindən biri hesab olunur. UNESCO da gölün müstəsna təbii və ekoloji əhəmiyyətini nəzərə alaraq Duz gölü Xüsusi Ətraf Mühitin Mühafizəsi Ərazisini Ümumdünya İrsinin İlkin Siyahısına daxil edib.

Yaxınlıqdakı görməli yerlər: Səyahətinizi qeyri-adi pəri bacaları, qədim mağara yaşayış məskənləri və unudulmaz isti hava şarı mənzərələri ilə Kapadokiyada davam etdirə bilərsiniz.

Şərqi Anadoluda tarix və təbiətin vəhdəti: Van gölü, Nemrut gölü və Otlukbeli gölü

Şərqi Anadolu Türkiyənin ən maraqlı üç gölünü bir araya gətirir və hər biri özünəməxsus təbiət mənzərəsi ilə seçilir. Bölgənin ən böyük şəhəri olan Van Türkiyənin ən böyük gölü və dünyanın ən böyük soda gölü sayılan Van gölünə ev sahibliyi edir. Gölün özünəməxsus sularında yaşayan yeganə balıq növü olan inci kefalı isə bölgənin məşhur yerli təamlarından biridir. Yaxınlıqdakı Bitlis vilayətində yerləşən Nemrut gölü Türkiyənin ən böyük, dünyanın isə ikinci ən böyük krater gölüdür. Dəniz səviyyəsindən 2250 metr yüksəklikdə, Nemrut vulkanının nəhəng kalderasında yerləşən göl dik dağlarla, zəngin flora və fauna ilə əhatə olunub. Kalderada yağış suları ilə qidalanan beş göl, həmçinin isti su mənbələri, fumarollar və buz mağaraları yerləşir ki, bu da əraziyə olduqca təsirli mənzərə bəxş edir və təbiət qoynunda müxtəlif fəaliyyətlər üçün geniş imkanlar yaradır. Daha şimalda, Ərzincanda yerləşən Otlukbeli gölü isə daha bir nadir geoloji möcüzəni nümayiş etdirir. Mineral tərkibli suların yaratdığı travertin səddinin formalaşdırdığı bu qorunan təbiət abidəsi gölü əhatə edən mineral tərkibli qırmızı torpaqdan axan bulaq sularının yaratdığı diqqətçəkən qırmızı rəngi ilə məşhurdur.

Yaxınlıqdakı görməli yerlər: Göl səyahətinizi hər bir məkanın ətrafındakı zəngin mədəni irslə tamamlayın. Van gölünün mənzərəsi qarşısında ənənəvi Van səhər yeməyindən zövq alın və gölün şərqində yerləşən, Urartu sivilizasiyasında müharibə tanrısı Haldi üçün dini mərkəz kimi fəaliyyət göstərmiş Van qalasını ziyarət edin. Nemrut gölünü kəşf etdikdən sonra Bitlis şəhər mərkəzinə yollanaraq şəhərin ən seçilən tarixi abidələrindən olan, monumental portalı və incə daş işləmələri ilə diqqət çəkən Bitlis qalası və İhlasiye mədrəsəsini görə bilərsiniz. Səyahətinizi Ərzincanda davam etdirərək, şəlalə suları, qayalıq terrasları və yamyaşıl ətrafı ilə təbiətin qoynunda sərinləmək üçün ideal məkan olan Girlevik şəlaləsinə baş çəkin.