Yaxın Şərqdə təhlükəsizliklə bağlı narahatlıqların artmasından sonra ABŞ Səudiyyə Ərəbistanı ilə bağlı diqqətçəkən qərar qəbul edib.

ERAmedia xəbər verir ki, Vaşinqton administrasiyası ölkədə təcili vəzifələrdə çalışmayan diplomatik heyətə və onların ailə üzvlərinə Səudiyyə Ərəbistanını tərk etmək barədə göstəriş verib. ABŞ Dövlət Departamenti qərarın səbəbi kimi husilərin hücumlarını və artan təhlükəsizlik risklərini göstərib.

Yaxın Şərqdə baş verən hadisələr fonunda ABŞ Səudiyyə Ərəbistanındakı diplomatik nümayəndəlikləri ilə bağlı mühüm təhlükəsizlik tədbirini qüvvəyə mindirib.

ABŞ Dövlət Departamentinin açıqlamasına görə, Səudiyyə Ərəbistanında çalışan təcili vəzifələrdə olmayan diplomatik heyətə və onların ailə üzvlərinə ölkəni tərk etmək tapşırılıb.

Bildirilib ki, qərar regionda təhlükəsizlik risklərinin artması ilə əlaqədar qəbul edilib.

ABŞ Dövlət Departamenti açıqlamasında xüsusilə Yəməndəki husilərin Səudiyyə Ərəbistanına qarşı fəaliyyətlərinə diqqət çəkib.

Departamentin bəyanatında deyilir:

“İranın dəstəklədiyi husilər Səudiyyə Ərəbistanına qarşı getdikcə daha çox düşmənçilik xarakterli fəaliyyətlər göstərir. Bu hücumlar mülki şəxslərin ölümünə və ciddi nəqliyyat problemlərinə səbəb olur”.

Vaşinqton administrasiyasının bu hadisələri ölkədəki amerikalı əməkdaşlar üçün artan təhlükəsizlik riski kimi qiymətləndirdiyi qeyd olunub.

Qəbul edilən qərar ABŞ-ın Səudiyyə Ərəbistanındakı bütün diplomatik heyətini təxliyə etməsi demək deyil. Göstəriş yalnız təcili vəzifələrdə çalışmayan diplomatik əməkdaşları və onların ailə üzvlərini əhatə edir.

Kritik diplomatik vəzifələri yerinə yetirən əməkdaşların isə ölkədə fəaliyyətlərini davam etdirmələri gözlənilir.

ABŞ Dövlət Departamenti qərardan sonra yayılan başqa bir iddiaya da aydınlıq gətirib.

Vaşinqtonun bütün Körfəz ölkələrində fəaliyyət göstərən amerikalı diplomatlara olduqları ölkələri tərk etmək barədə göstəriş verdiyi iddia olunub.

Lakin Departament bu xəbərləri təkzib edərək qərarın bütün Körfəz ölkələrindəki ABŞ diplomatik heyətinə şamil edilmədiyini bildirib.

Regionda təhlükəsizlik risklərinin artdığı bir vaxtda Vaşinqtonun Səudiyyə Ərəbistanındakı diplomatik heyətinin bir hissəsinin ölkədən çıxarılması ilə bağlı qərarı Körfəz bölgəsindəki proseslərə diqqəti yenidən artırıb.

Əli Fərhad