Azərbaycanın elm və ictimai-siyasi həyatında özünəməxsus iz qoymuş Dilarə Əliyeva həm elmi fəaliyyəti, həm də milli azadlıq hərəkatındakı mövqeyi ilə yadda qalan şəxsiyyətlərdən biridir.

ERAmedia xəbər verir ki, görkəmli alim və ictimai xadim 1991-ci il aprelin 19-da baş vermiş avtomobil qəzasında tanınmış türkoloq alim, siyasətçi və ictimai xadim Aydın Məmmədovla birlikdə həyatını itirib.

1929-cu il dekabrın 14-də Tbilisidə dünyaya gələn Dilarə Əliyeva ilk təhsilini şəhərdəki 97 nömrəli Azərbaycan məktəbində alıb. Daha sonra Azərbaycan Dövlət Universitetinin Şərqşünaslıq fakültəsində ali təhsilini davam etdirib. Elmi fəaliyyətə başladıqdan sonra aspirantura təhsili alan Əliyeva tədqiqatlarını Gürcüstan Elmlər Akademiyasının Şota Rustaveli adına Ədəbiyyat İnstitutunda da davam etdirib.

Onun uzun illər davam edən elmi fəaliyyəti Azərbaycan ədəbiyyatşünaslığının müxtəlif istiqamətlərini əhatə edib. Nizami Gəncəvinin yaradıcılığı və Azərbaycan-gürcü ədəbi əlaqələri ilə bağlı araşdırmalar aparan alim bir sıra elmi vəzifələrdə çalışıb. Nizami adına Ədəbiyyat Muzeyində və Nizami adına Ədəbiyyat İnstitutunda müxtəlif vəzifələr tutub. “Nizami və gürcü ədəbiyyatı” mövzusunda doktorluq dissertasiyası müdafiə edərək filologiya elmləri doktoru elmi dərəcəsini qazanıb.

Dilarə Əliyevanın fəaliyyəti yalnız elmi sahə ilə məhdudlaşmayıb. 1988-ci ildən etibarən Azərbaycanda geniş vüsət alan milli azadlıq hərəkatına qoşulan ziyalı AXC-nin İdarə Heyətinin üzvlərindən biri olub. O, ölkənin ictimai-siyasi həyatında fəal iştirak edib, qadın hüquqlarının müdafiəsi istiqamətində də mühüm təşəbbüslərlə çıxış edib.

Azərbaycan Qadın Hüquqlarını Müdafiə Cəmiyyətinin yaradıcılarından və rəhbərlərindən biri olan Dilarə Əliyeva qadınların cəmiyyətdə hüquq və imkanlarının genişləndirilməsini vacib hesab edirdi. O, həmçinin Azərbaycan SSR əməkdar mədəniyyət işçisi fəxri adına layiq görülüb və XII çağırış Azərbaycan Ali Sovetinin deputatı seçilib.

Dilarə Əliyevanın 1991-ci il aprelin 19-da Aydın Məmmədovla birlikdə həlak olması Azərbaycan ictimaiyyətinin yaddaşında faciəli hadisə kimi qalıb. Onların ölümü ilə Azərbaycan iki tanınmış ziyalısını, elm və ictimai-siyasi həyatın fəal nümayəndələrini itirib.

Mələk Onur