Çinin Quandun əyalətinin Şençjen şəhərində APEC Liderlər Sammiti öncəsi görülən təhlükəsizlik tədbirləri diqqət çəkib. Restoranlarda istifadə olunan mətbəx bıçaqlarının belə metal zəncirlərlə sabitlənməsi müzakirələrə səbəb olub.

ERAmedia xəbər verir ki, şəhərin Lonqhua rayonunda fəaliyyət göstərən restoranlardan birinin sahibi sosial şəbəkədə paylaşdığı videoda mətbəxindəki bıçaqların metal zəncirlərlə bağlandığını nümayiş etdirib.

Restoran sahibi bildirib ki, zəncirlər polis əməkdaşları tərəfindən müəssisəyə gələrək quraşdırılıb. Onun sözlərinə görə, ətrafdakı digər iaşə obyektlərində də oxşar tədbirlər həyata keçirilib. Sahibkar bıçaqlardan zəncirli vəziyyətdə istifadə etməyin yemək hazırlanmasını xeyli çətinləşdirdiyini vurğulayıb.

Tayvan mətbuatının məlumatına görə, təhlükəsizlik tədbirləri yalnız restoranlarla məhdudlaşmayıb. Şençjenə internet vasitəsilə bıçaq sifariş etmək istəyən bəzi şəxslər də məhdudiyyətlərlə üzləşiblər.

İstifadəçilərdən biri Şençjendə yaşayan yaxınlarının ünvanına mətbəx bıçağı sifariş etmək istədikdə sifarişi tamamlaya bilmədiyini bildirib. Onun sözlərinə görə, müştəri xidmətləri 28 oktyabr – 19 noyabr tarixləri arasında müəyyən növ kəsici alətlərin şəhərə göndərilməsinə icazə verilmədiyini açıqlayıb.

Bununla belə, bıçaqların zəncirlənməsi praktikasının şəhər üzrə məcburi xarakter daşıdığına və ya bütün kargo şirkətlərinin eyni qadağanı tətbiq etdiyinə dair rəsmi təsdiq yoxdur.

Şençjendə sammitə hazırlıq çərçivəsində pilotsuz uçuş aparatlarının (PUA) uçuşlarına da məhdudiyyətlər tətbiq edilib. Metro stansiyalarında sərnişinlərin və çantaların yoxlanılması gücləndirilib, yanğın təhlükəsizliyi ilə bağlı nəzarət tədbirləri də artırılıb.

Quandun əyalətinin rəsmiləri noyabrın 1-də APEC sammiti ilə bağlı təhlükəsizlik hazırlıqlarını müzakirə ediblər. Görüşdə Şençjenə digər bölgələrdən əlavə polis qüvvələrinin göndərilməsi, strateji əhəmiyyətli məntəqələrin mühafizəsi və təhlükəli maddələrin daşınmasına nəzarətin gücləndirilməsi barədə qərar qəbul olunub.

21 iqtisadiyyatı birləşdirən Asiya-Sakit Okean İqtisadi Əməkdaşlığı (APEC) təşkilatının liderlər sammiti noyabrın 18-19-da Şençjen şəhərində keçiriləcək. Tədbirdə Çin Sədri Si Cinpinlə yanaşı, ABŞ Prezidenti Donald Tramp və Rusiya Prezidenti Vladimir Putinin də iştirakı gözlənilir.

Üç liderin sammit çərçivəsində bir araya gəlməsi ehtimalı da beynəlxalq mətbuatda müzakirə olunur. Kremlin rəsmiləri üçtərəfli görüş imkanının nəzərdən keçirildiyini açıqlasalar da, belə bir görüşün baş tutacağına dair hələlik rəsmi proqram açıqlanmayıb.

Restoranlarda gündəlik istifadə olunan mətbəx bıçaqlarının zəncir və qıfıllarla sabitlənməsi təhlükəsizlik tədbirlərinin miqyası ilə bağlı müzakirələrə yol açıb.

Qeyd edək ki, Şençjen polisi daha əvvəl də qeydiyyatsız və nəzarətə götürülən kəsici alətlərin satışına qarşı yoxlamalar aparıb. Lakin restoranlarda istifadə olunan mətbəx bıçaqlarının zəncirlənməsi praktikasının rəsmi əhatə dairəsi və bu tədbirin birbaşa APEC sammiti ilə əlaqədar tətbiq edilib-edilmədiyi hələ dəqiq məlum deyil.

Əli Fərhad