Ukrayna prezidenti Volodimir Zelenski Kiyevin getdikcə intensivləşən pilotsuz uçuş aparatı (PUA) əməliyyatlarının Rusiya hava məkanını sərnişin təyyarələri üçün daha da təhlükəli vəziyyətə gətirəcəyi barədə xəbərdarlıq edib.

ERAmedia xəbər verir ki, aviaşirkətləri, sığorta şirkətlərini və xarici hökumətləri Rusiya hava məkanından istifadə ilə bağlı riskləri nəzərə almağa çağırıb.

Zelenski sentyabrın 1-də axşam saatlarında verdiyi açıqlamada bildirib ki, Moskvanın dörd ildən artıq əvvəl başlatdığı müharibənin nəticələri artıq yalnız Ukrayna ərazisi ilə məhdudlaşa bilməz.

Ukrayna prezidenti Kiyevin artan PUA əməliyyatlarının yaxın vaxtlarda Rusiya hava məkanını təhlükəsiz olmaqdan çıxaracağını vurğulayıb.

“İlk raketlər və ilk PUA-lar Rusiyadan gəldi və ölkəmizin sərhədini Rusiya hava məkanından keçərək aşdı. Bu eskalasiya Ukrayna ərazisi ilə məhdudlaşa bilməz və məhdudlaşmayacaq”, – Zelenski deyib.

Ukrayna liderinin xəbərdarlığı yalnız Moskvaya deyil, həmçinin Rusiya hava məkanından istifadə edən, Moskva, Sankt-Peterburq və digər iri şəhərlərdəki hava limanlarına uçuşlar həyata keçirən aviaşirkətlərə, sığorta şirkətlərinə və xarici hökumətlərə ünvanlanıb.

Zelenski bildirib ki, Rusiya hava məkanından istifadə edən bütün aviaşirkətlər və ölkənin əsas hava limanlarından yararlanmağa davam edən tərəflər mövcud təhlükəni nəzərə almalıdırlar.

“Bu gün Rusiya hava məkanından istifadə edən bütün aviaşirkətləri, bütün sığorta şirkətlərini və Rusiyanın əsas hava limanlarından istifadəni davam etdirən hər kəsi xəbərdar etmək istəyirik: Rusiya hava məkanı getdikcə tamamilə təhlükəli vəziyyətə gəlir”, – deyə o bildirib.

Ukraynanın mülki təyyarələri hədəf almadığını xüsusi vurğulayan Zelenski, eyni zamanda Rusiya səmasında PUA-ların miqyasının nəzərə alınmalı olduğunu qeyd edib.

“Ukrayna mülki aviasiyanı təhdid etmir, heç bir mülki təyyarəni hədəf almır. Lakin Rusiya səmasında nəzərə alınmalı miqyasda PUA-lar olacaq”, – Ukrayna Prezidenti deyib.

Zelenski daha sonra “Rusiya hava məkanı faktiki olaraq bağlanacaq. Rusiyanın başlatdığı müharibə Rusiyanın səmasını bağlayır” ifadəsini işlədib.

Qeyd edək ki, Rusiya 24 fevral 2022-ci ildə Ukraynaya qarşı genişmiqyaslı işğala başlayandan sonra Ukrayna hava məkanı mülki aviasiya üçün bağlıdır.

Rusiyada isə mülki aviasiya müharibə dövründə fəaliyyətini davam etdirib. Bununla belə, Ukraynanın PUA hücumları fonunda uçuşlarda son dövrlər daha tez-tez fasilələr yaranıb, hava limanlarının fəaliyyəti isə müvəqqəti dayandırılıb.

Kiyevin uzaqmənzilli əməliyyatları zamanı əsasən Rusiyanın müharibə səylərini dəstəkləyən hərbi obyektlər və infrastruktur hədəf alınır. Bunlar arasında hərbi hava bazaları, raket bölmələri, neft emalı zavodları və digər enerji obyektləri yer alır.

Zelenski bu siyasətin dəyişməyəcəyini bildirərək Ukraynanın günahsız insanların həyatını itirməsini istəmədiyini vurğulayıb.

“Partnyorlarımızı xəbərdar edirik: Rusiya səmasında təhlükəsiz günlər başa çatıb”, – deyə Ukrayna lideri bildirib.

O, həmçinin Kiyev və Moskvadakı xarici səfirləri bu mesajı öz hökumətlərinə çatdırmağa çağırıb.

Zelenski Ukrayna Xarici İşlər Nazirliyinin və digər dövlət qurumlarının Rusiya hava məkanında yaranan təhlükələrlə bağlı ətraflı məlumatları beynəlxalq təşkilatlarla paylaşacağını da açıqlayıb.

Vural