Yaponiyanın Casio şirkəti indiyədək istehsal olunmuş ən bahalı seriyalı kalkulyator hesab edilən S100X modelini təqdim edib.

ERAmedia xəbər verir ki, məhdud sayda, cəmi 650 ədəd buraxılan bu modelin Yaponiyada satış qiyməti 99 min yen (təxminən 624 ABŞ dolları) təşkil edir.

S100X adi kalkulyatordan daha çox incəsənət əsərini xatırladır. Qurğunun korpusu bütöv alüminium blokdan frezlənərək hazırlanıb və ənənəvi yapon urushi lakı ilə əl işləri üsulu ilə örtülüb. Bu lak növü adətən yüksək keyfiyyətli qutuların, qab-qacağın və dekorativ əşyaların hazırlanmasında istifadə olunur.

Modelin üzlənməsi 1930-cu ildən fəaliyyət göstərən “Yamakyu Shitsuki” şirkətinin ustası Ryuci Umeda tərəfindən həyata keçirilir. Hər bir kalkulyatorun hazırlanmasına təxminən bir ay vaxt sərf olunur. Lak bir neçə qat şəklində tətbiq edilir, hər qat ayrıca cilalanır və parıldadılır. Bu səbəbdən hər nümunə özünəməxsus görünüşə malikdir.

Texniki baxımdan S100X klassik 12 rəqəmli LCD displey ilə təchiz edilib. Mavi rəngli ekran dizaynerlər tərəfindən mürəkkəb qələmin mürəkkəbini xatırladacaq şəkildə hazırlanıb. Kalkulyator standart hesablamalarla yanaşı, valyuta çeviricisi və vergi hesablanması funksiyalarını da dəstəkləyir.

Qurğu günəş paneli və düymə tipli batareya ilə işləyir. İstehsalçının məlumatına görə, gündə orta hesabla bir saat istifadə edildiyi halda batareyanın xidmət müddəti 7 ilə çatır.

Casio bildirir ki, S100X yüksək funksionallıq üçün deyil, yapon sənətkarlığını, minimalizmi və əl əməyini qiymətləndirən kolleksiyaçılar üçün hazırlanıb. Məhdud tiraj səbəbindən modelin qısa müddətdə satılıb tükənəcəyi gözlənilir. Hazırda kalkulyator yalnız Yaponiyada satışa çıxarılıb və beynəlxalq bazara təqdim olunacağı barədə məlumat verilməyib.

Müqayisə üçün qeyd olunur ki, indiyədək satışa çıxarılan ən bahalı kalkulyatorların qiyməti təxminən 300–400 ABŞ dolları olub və əsasən qızıl örtük və ya qiymətli daşlarla bəzədilməsi ilə fərqlənib. Casio S100X isə əl işi, ənənəvi yapon lakı və məhdud tirajı sayəsində bu kateqoriyada yeni rekord müəyyənləşdirib.